პარლამენტის თავმჯდომარე შალვა პაპუაშვილი რუსეთის მიერ ქართული პროდუქციის ნაწილის რუსეთში შეტანის აკრძალვას ბრიფინგზე გამოეხმაურა. ის აცხადებს, რომ საქართველოს მთავრობა გაარკვევს შეზღუდვის მიზეზებს და იმედოვნებს, რომ გადაწყვეტილება შეიცვლება.

მისი თქმით, "ქვეყნისთვის, რომელიც ისეთ გეოპოლიტიკურ მდგომარეობაშია, როგორც საქართველო, ბევრი რამე არის რისკის წარმომშობი".

"არა მხოლოდ რუსეთში ვაჭრობა, ევროკავშირში ვაჭრობაც თავის რისკებს იწვევს, აგერ სანქციებს ითხოვენ და ასე შემდეგ. ვხედავთ იქ მუქარას, მათ შორის ყულევის სპორტთან დაკავშირებით და ასე შემდეგ. რისკები ყველგან, ყველა ბაზარზეა. აქ მსოფლიო პოლიტიკა არ არის ასე მოწყობილი, რომ ქვეყნები ერთმანეთთან რაღაც მეგობრულ ყიჟინაში არიან. ძალიან მკაცრი და პრაგმატული პოლიტიკა არის საერთაშორისო პოლიტიკაში. ასე რომ, რისკები რუსულ ბაზარზეცაა, ევროკავშირის ბაზარზეცაა, ყველგანაა. ვხედავთ, რომ ხან ერთგან ტარიფები იზრდება, ხან მეორეგან სანქციები წესდება, ხან მეოთხისგან საზღვრების ჩაკეტვა უნდათ და ასე შემდეგ. ასე რომ, ჩვენთვის მნიშვნელოვანია, რომ ვიმოქმედოთ ჩვენი ხალხის და ეკონომიკური აქტორების ინტერესებიდან გამომდინარე, სადაც ექნება შესაძლებლობა ქართულ ბიზნესს, რომ ყველაზე სარფიანი იყოს მისი ბიზნესი, იქ უნდა იმოქმედოს. არა პოლიტიკური გადაწყვეტილებებით, როგორც გვეუბნებოდნენ, რომ უარი თქვით რუსულ ბაზარზე და ასე შემდეგ.

...ჩვენ სწორები ვიყავი იმაში, რომ მნიშვნელოვანია, არ გვქონდეს ესკალაციის პოლიტიკა, იმიტომ როდესაც გაქვს ღია ეკონომიკა, როდესაც ვაჭრობ სხვადასხვა ქვეყანასთან, ბევრ ქვეყანას აქვს ბერკეტები და არა მხოლოდ რუსეთს. გაიხედეთ გარშემო, ჩვენი ქვეყნის გარშემო, ვისთან ვაჭრობთ და ვის რა ინტერესები შეიძლება ჰქონდეს და მიხვდებით, რომ ეკონომიკური ბერკეტები ბევრ ქვეყანას აქვს და სწორედ ეს არის პოლიტიკის მთელი მიზანი, რომ ჰქონდეს ისეთი დაბალანსებული პოლიტიკა, რომელიც ერთი რომ არავის მისცემს საბაბს, რომ ბერკეტები გამოიყენოს და მეორეს მხრივ მაქსიმალურად სარგებლიანად იმოქმედოს.

რაც შეეხება რუსეთთან ვაჭრობას, თქვენ არ ნახეთ ბოლო სტატისტიკა, ევროკავშირმა რამდენი ასეულობით მილიარდის გაზი და ნავთობი იყიდა რუსეთისგან, მაშინაც რომ ომი დაიწყო? გვახსოვს თქვენ ცოტა ხნის წინ იყო, თუ არ ვცდები, ფინეთის თუ შვედეთის საგარეო საქმეთა მინისტრმა წარმოადგინა სტატისტიკა, რომ ევროკავშირმა რუსეთს უფრო მეტი ფული გადაუხადა ენერგომატარებლებში, ვიდრე უკრაინას მისცა. ვხედავთ ამერიკის შეერთებული შტატების გადაწყვეტილებებს, როდესაც სანქციებს უხსნის იმისთვის, რომ რუსული ნავთობი იყიდონ. ასე რომ, რუსეთის ეკონომიკური იზოლაცია, ეს ზღაპარი, რომელიც ცდილობდნენ, რომ მიეყიდათ პატარა ქვეყნებისთვის, საქართველო თავის დროზე კარგად მიხვდა, რომ ეს იყო ზღაპარი. ჩვენ გვეუბნებოდნენ ღვინოსთან დაკავშირებით ზუსტად, ღვინოს ნუ ყიდით რუსეთშიო და აღმოჩნდა, რომ ლიტვა ჩვენზე მეტ ღვინოს ყიდდა რუსეთში ომის პერიოდში.

[რუსეთში ქართული პროდუქციის ნაწილზე ემბარგოს მიზეზი] გაურკვეველია, გაუგებარია, რა არის ამის საფუძველი. ამაში გაერკვევა საქართველოს მთავრობა. იმედი გვაქვს, რომ გადაწყვეტილება შეიცვლება", — განაცხადა პაპუაშვილმა.

რუსული მედიის ცნობით, "როსპოტრებნადზორმა" (მომხმარებელთა უფლებების დაცვისა და სანიტარიულ-ეპიდემიოლოგიური ზედამხედველობის სახელმწიფო უწყებამ) ქართული სასმელების — ღვინის, კონიაკის, ლუდის, მინერალური წყლისა და გაზიანი სასმელების ნაწილის რუსეთში იმპორტი და გაყიდვა დროებით აკრძალა. გადაწყვეტილება ევრაზიის ეკონომიკური კომისიის საბჭოს დადგენილებას ეფუძნება.