სააპელაციო სასამართლომ ძალაში დატოვა იური ვაზაგაშვილის განზრახ მკვლელობაში მსჯავრდებული გიორგი სოსანაშვილის მიმართ, საქალაქო სასამართლოს 2015 წლის 6 ნოემბერს გამოტანილი გამამტყუნებელი განაჩენი. ამის შესახებ პროკურატურა განცხადებას ავრცელებს:

"განაჩენის თანახმად, სასამართლომ ბრალდებული გიორგი სოსანაშვილი დამნაშავედ სცნო. 2015 წლის 20 იანვარს, კასპის რაიონის სოფელ ყარაფილაში, შვილის საფლავზე იური ვაზაგაშვილის განსაკუთრებული სისასტიკით მკვლელობაში, საქართველოს სსკ-ის 109-ე მუხლის პირველი ნაწილის გ ქვეპუნქტით, მე-3 ნაწილის ბ და ვ ქვეპუნქტებით, 236-ე მუხლის პირველი და მეორე ნაწილებით და შთანთქმის პრინციპის გამოყენებით, საბოლოო სასჯელად განუსაზღვრა თავისუფლების აღკვეთა 20 წლის ვადით".

პროკურატურის მტკიცებით, გიორგი სოსანაშვილმა კასპის რაიონის სოფელ ყარაფილაში ზურაბ ვაზაგაშვილის შვილის საფლავზე იური ვაზაგაშვილის მოკვლის მიზნით დაამონტაჟა ასაფეთქებელი მოწყობილობა.

2015 წლის 20 იანვარს, ახლობლის დაკრძალვაზე, სოფელ ყარაფილაში ჩასული იური ვაზაგაშვილი მივიდა საკუთარი შვილის ზურაბ ვაზაგაშვილის საფლავზე, სადაც სასაფლაოზე დამონტაჟებული ასაფეთქებელი მოწყობილობის აფეთქების შედეგად ადგილზე გარდაიცვალა.

გიორგი სოსანაშვილი ბრალდებულის სახით 2015 წლის 7 თებერვალს დააკავეს.