ამერიკის ყოფილმა ელჩმა რუსეთში მაიკლ მაკფოლიმ Twitter-ზე ბრიტანეთის ევროკავშირიდან გასვლის გადაწყვეტილება შეაფასა და მას რუსეთის პრეზიდენტის გამარჯვება უწოდა:

"შოკირებული ვარ Brexit-ის შედეგებით! ამით წაგებულია ევროკავშირი, დიდი ბრიტანეთი და ამერიკა, ყველა, ვისაც სჯერა ძლიერი, ერთიანი, დემოკრატიული ევროპის. გამარჯვებულია - პუტინი".

მოგვიანებით მაკფოლიმ სხვა ტვიტიც გამოაქვეყნა:

"პუტინი კომპლიმენტებს იმსახურებს, მან გუშინ ღამით თავის საგარეო პოლიტიკაში გამარჯვება მოიპოვა Brexit-ის საშუალებით".

მაიკლ მაკფოლი 2 წლის განმავლობაში იყო ამერიკის ელჩი მოსკოვში. მან 2014 წლის თებერვალში დატოვა თანამდებობა "ოჯახური მიზეზების" გამო.

23 ივნისს ჩატარებულ რეფერენდუმში დიდი ბრიტანეთის ამომრჩეველთა უმრავლესობამ, 52-მა პროცენტმა, მხარი დაუჭირა ქვეყნის ევროკავშირიდან გამოსვლას. ევროკავშირში დარჩენის მომხრე მხოლოდ 48 პროცენტი აღმოჩნდა.