კომპანია Hyperloop One-მა და რუსულმა Summa Group-მა ხელი მოაწერეს შეთანხმებას, რომლის მიხედვითაც მხარეები რუსეთის დედაქალაქის მიმდებარედ ჰაიპერლუპის სისტემის აშენების პერსპექტივას შეისწავლიან.

"მოსკოვი 16 მილიონიანი ქალაქია, რომელშიც ლეგენდარული საცობებია. ჩვენი ტექნოლოგიის საშუალებით ადგილობრივები უფრო სწრაფად იმგზავრებენ და მათი ცხოვრების არათუ საათებს, არამედ კვირებს დაზოგავენ", ვკითხულობთ კომპანიის ოფიციალურ საიტზე გამოქვეყნებულ ბლოგპოსტში.

მომავლის პერსპექტივაში ჰაიპერლუპმა შესაძლოა მთელი რუსეთი დაფაროს და მგზავრები დასავლეთიდან შორეული აღმოსავლეთის რეგიონებში გადაიყვანოს.

რუსეთის ტრანსპორტის მინისტრის, მაქსიმ სოკოლოვის თქმით, განიხილება ჩინეთის ჯილინის პროვინციისა და რუსეთის შორეული აღმოსავლეთის ზარუბინოს ერთმანეთთან დაკავშირება. რის შედეგადაც, ორ რეგიონს შორის ტვირთის ბრუნვა საგრძნობლად გაიზრდება და ზარუბინო რეგიონში ჰაიპერლუპის ჰაბად იქცევა. თავდაპირველი გათვლებით, 70 კილომეტრიანი სატვირთო მილების მშენებლობა $400 - $670 მილიონი დაჯდება.

რუსეთში ფიქრობენ, რომ აღნიშნულ პროექტს აქვს პოტენციალი შეცვალოს გლობალური ლოჯისტიკური ბაზარი. ჰაიპერლუპის ახალი სისტემა ჩინეთის სატრანსპორტო ინიციატივის "ერთი სარტყელი - ერთი გზა" ნაწილიც შეიძლება გახდეს, ამ ინიციატივას ხშირად ახალ აბრეშუმის გზასაც უწოდებენ.