პარლამენტის თავმჯდომარე შალვა პაპუაშვილი უსაფრთხოების ნორმების გამო ჩაშლილი გორის ფესტივალის შესახებ ევროკავშირის განცხადებას ეხმაურება.

პაპუაშვილის განცხადებით, ევროკავშირმა "პასუხის ღირსადაც არ ჩათვალა საქართველოს მოქალაქეები" და პასუხი მხოლოდ "საქართველოს მოსახლეობის უმრავლესობის მაგინებლის", მუსიკოს Kordz-ის განცხადებას გასცა.

"ერთი კვირის განმავლობაში, რაც ცნობილი გახდა, რომ ტარდებოდა კონცერტი, სადაც ევროკავშირი ფულს უხდის საქართველოს მოსახლეობის უმრავლესობის მაგინებელს — ერთი კვირაა საზოგადოება ამ კითხვებზე პასუხს ელის, მედია მიმართავდა ევროკავშირს და პაველ ჰერჩინსკი ამაზე დუმდა. მან პასუხის ღირსადაც არ ჩათვალა მილიონ 200 ათასი საქართველოს მოქალაქე.

თუმცა, აი ამ ქართველი ხალხის მაგინებლის ერთ პოსტს განცხადებით გამოეხმაურა. ესეც ხომ აჩვენებს სად დგას დღეს ევროკავშირის წარმომადგენლობა თავისი ღირებულებებით, რომელიც პასუხის ღირსადაც არ თვლის ქართველებს და, აი, ამ Kordz-ის ერთ ინსტაგრამ-პოსტს ეგრევე ბოდიშებით გამოეხმაურა," — განაცხადა პაპუაშვილმა.

შალვა პაპუაშვილის კრიტიკა გამოიწვია, ევროკავშირის წარმომადგენლობის განცხადებაში ფრაზამ: "ევროკავშირს შემოქმედებითი გამოხატვის თავისუფლების მტკიცედ სჯერა". მისი თქმით, ეს "დაცინვაა".

"[ევროკავშირს განცხადების] ბოლო წინადადება დაცინვაა, რომ ეს არის გამოხატვის თავისუფლება და რომ ქართულ კულტურულ მემკვიდრეობას უფრთხილდებიან. ანუ პაველ ჰერჩინსკი გვეუბნება, რომ მოსახლეობის უმეტესობისთვის საჯაროდ დედის გინება არის ქართული კულტურული მემკვიდრეობა.

გვეუბნება, რომ მონის წოდება არის საქართველოს კულტურული მემკვიდრეობა. პაველ ჰერჩინსკის თუ ფაშისტები ვგონივართ ქართველები — მაშინ მართლა ვერაფერი ვერ გაუგია ამ ადამიანს. თუ მისი სტანდარტი არის, რომ დედის გინება არის გამოხატვის თავისუფლება, მივიღებთ ამას მხედველობაში.

ეს განცხადება, რაც დადო ევროკავშირის საელჩომ, არის პირდაპირი წაქეზება სიძულვილის. იმედგაცრუებული ვარ პაველ ჰერჩინსკის ამ ქცევის გამო, რომლითაც ქართველ ხალხს გვაჩვენა, როგორ განგვიხილავს ჩვენ. მერე გამოდის და დამტვრეული ქართულით რაღაცებს ლაპარაკობს. ვის რაში სჭირდება მაგის დამტვრეული ქართული, თუ ასეთ რაღაცას აკადრებს ქართველ ხალხს," — ამბობს პაპუაშვილი.

დანიის კულტურის ინსტიტუტმა გუშინ, 23 სექტემბერს, 26 სექტემბერს გორში დაგეგმილი "კამარა ფესტივალი" უსაფრთხოების მიზნებიდან გამომდინარე გააუქმა. ღონისძიება შემოქმედებით ვორქშოპებს, საჯარო საუბრებს და მუსიკას აერთიანებს და ის ალექსანდრე კორძაიას, იგივე Kordz-ს უნდა დაეხურა.