ქართული ოცნება თიანეთის საოლქო კომისიის გადაწყვეტილების სასამართლოში გასაჩივრებას გეგმავს. თიანეთის მერობის კანდიდატი მმართველი პარტიიდან ლელა ქიტესაშვილმა On.ge-ს განუცხადა, ოთხ უბანში ჯამში ექვსი ბიულეტენია დაკარგული. საუბარია მეორე, მე-13, მე-15 და მე-19 უბნებზე.

ქიტესაშვილის თქმით, მასსა და მის კონკურენტს, თამაზ მეჭიაურს შორის განსხვავება ერთი ხმაა და დაკარგული ბიულეტენები გავლენას ახდენს საბოლოო შედეგზე. კანდიდატი განმარტავს, რომ საარჩევნო კოდექსით (მუხლი 169, პუნქტი 2), მერის არჩევნებში გამარჯვებულმა პირმა არჩევნებში მონაწილეთა ხმების ნახევარზე მეტი უნდა მიიღოს. კანონით, არჩევნებში მონაწილეთა ხმების რაოდენობაში არ ჩაითვლება ბათილად ცნობილი საარჩევნო ბიულეტენები.

"დაკარგული ბიულეტენები ვერ გაბათილდება. დღევანდელი მდგომარეობით, ბარიერი არცერთ ჩვენგან გვაქვს გადალახული", - დასძენს ქიტესაშვილი.

კითხვაზე - თუ სააპელაციო სასმართლო მის სასარგებლოდ მიიღებდა გადაწყვეტილებას იგივე საკითხზე იდავებდა თუ არა - ქიტესაშვილი ასე პასუხობს:

"ზოგადად გამარჯვებულები, დამეთანხმებით, რომ არ ასაჩივრებენ ხოლმე, მაგრამ აუცილებლად იდავებდა დამარცხებული მხარე. ეს არის აუცილებლად ანგარიშგასაწევი ფაქტი", - ამბობს ქიტესაშვილი.

ცესკოს დღევანდელი მონაცემებით, თიანეთის მერი თამაზ მეჭიაურია. ის თავის კონკურენტს ერთი ხმით სჯობნის.

მანმდე ცესკოს მონაცემებით, თამაზ მეჭიაური კონკურენტ ლელა ქიტესაშვილს, რომელიც ქართული ოცნების კანდიდატი იყო, არჩევნებს ერთი ხმით უგებდა, თუმცა, საოლქო კომისიამ გაბათილებული ხუთი ბიულეტენი ვარგისად მიიჩნია. შედეგად, ლელა ქიტესაშვილს 3 081 ხმა მიაკუთვნა, მეჭიაურს კი - 3 077.

თამაზ მეჭიაური მიიჩნევდა, რომ საოლქოს გადაწყვეტილება უკანონო იყო, იგივეს იზიარებდნენ არასამთავრობო ორგანიზაციებიც. მათი აზრით, საოლქო კომისიას ბათილად ცნობილი ბიულეტენები ვარგისად არ უნდა მიეჩნია და არჩევნებში გამარჯვებულად მეჭიაური უნდა გამოცხადებულიყო.

თიანეთის მერის გასარკვევად მცხეთის რაიონულმა სასამართლომ და თბილისის სააპელაციო სასამართლომ იმსჯელეს. ორივე სასამართლოს მიერ მიღებული გადაწყვეტილებებით მეჭიაური ხდებოდა მერი.