სააპელაციო სასამართლომ შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს ყოფილი უფროსის, იოსებ სიგუას მიმართ გამოწერილი შემაკავებელი ორდერი გააუქმა. სიგუას შემაკავებელი ორდერით მეუღლესთან მიახლოება ეკრძალებოდა.

სიგუას მეუღლემ, სოფიო სიგუა-შატბერავამ, სასამართლოს გადაწყვეტილებაზე საუბრისას განაცხადა, რომ მის მეუღლეს, შსს-ს ყოფილ მაღალჩინოსანს მფარველობენ და თავს დაცულად ვერასდროს იგრძნობს.

"შემაკავებელი იმიტომ გააუქმა ალბათ, რომ უკვე ვადა ჰქონდა მოხდილი. მას მთელი ეს სიტემა იცავს იმიტომ, რომ როგორ შეიძლება შემაკავებელი ორდერი დაარღვიო და შენ არ დაგაპატიმრონ. ზუსტად აბალანსებენ, ხალხზე მოქმედებენ ამით, რომ ანუ ჩვენ კი დავუტოვეთ, სამაჯური მივეცით, მაგრამ ახლა გავუუქმეთ ანუ ორმაგ სტანდარტში მუშაობენ.

ვიცოდი, რომ მას მფარველობდნენ, მე დაცულად არასოდეს არ ვგრძნობ თავს. ე.ი მე რომ ეს 13 წელი ვიყავი ჩუმად, თურმე უნდა ვყოფილიყავი ჩუმად იმიტომ, რომ რა შეგრძნებაც მქონდა მაშინ დაუცველობის, რომ სამართალი ჩემკენ არ იქნებოდა, ზუსტად ეს დამიდასტურეს ამათმა," — განაცხადა იოსებ სიგუას მეუღლემ "ტვ პირველთან" საუბრისას.

სოფია სიგუა-შატბეროვამ მეუღლის წინააღმდეგ ბრალდებები თავდაპირველად "ნოდარ მელაძის შაბათში" 5 ივლისს გააჟღერა. მისი თქმით, იოსებ სიგუა მას სიცოცხლის მოსპობით და მე-12 სართულიდან გადაგდებით ემუქრებოდა, ერთხელ კი იარაღიც შუბლზე მიადო. სოფია სიგუა იმასაც ამბობდა, რომ ქმარი მას ორსულობის დროსაც სცემდა. იოსებ სიგუას 2026 წლის 21 თებერვალს შემაკავებელი ორდერიც გამოუწერეს.