მანჰეტენზე 31 ოქტომბრის თავდასხმა ნიუ-იორკის მერმა ბილ დე ბლასიომ ტერორისტულ აქტად შეაფასა. ინფორმაციას CNN ავრცელებს.

"ჩვენს ხელთ არსებული ბოლო ინფორმაციით, ეს იყო ტერორისტული აქტი. ჩვენი ქალაქისთვის ძალიან სევდიანი დღეა" - თქვა ბლასიომ.

ბოლო ცნობებით, დაღუპულია რვა და დაშავებულია უამრავი ადამიანი.

მანჰეტენზე, ნიუ-იორკის სავაჭრო ცენტრის მახლობლად, შუადღის 3 საათზე სატვირთო მანქანა ველო-ბილიკზე გადავიდა. საწინააღმდეგო მიმართულებით მოძრაობისას, ის ველოსიპედით მოსიარულეებს და გამვლელებს ეჯახებოდა, საბოლოოდ კი ის სკოლის ავტობუსს შეეჯახა, რის შედეგად, ავტობუსში მყოფი ორი ბავშვი და ორი მოზრდილი დაშავდა.

თავდამსხმელის მიერ დაქირავებული სატვირთო მანქანა.

ფოტო: Bebeto Matthews / AP

სატვირთოს მძღოლი 29 წლის კაცია, რომელიც შეიარაღებული იყო. მანქანიდან გადმოსვლის შემდეგ მან ცეცხლი გახსნა. ნიუ-იორკის პოლიციამ თავდამსხმელი სროლის შემდეგ დააკავა და ამჯერად ის საავადმყოფოშია გადაყვანილი. გამოძიების ინტერესებიდან გამომდინარე, პოლიცია მის ვინაობას არ ასახელებს.

ფოტო: Mark Lennihan / AP