თბილისის საქალაქო სასამართლომ შსს-ის ყოფილი მაღალჩინოსნის, იოსებ სიგუას მიმართ გამოწერილი შემაკავებელი ორდერი ძალაში დატოვა.

სიგუას მეუღლის ადვოკატის, თამარ ლუკავას განმარტებით, სასამართლოს ეს გადაწყვეტილება გამომდინარე იყო იმ გარემოებებიდან, რომ მისი დაცვის ქვეშ მყოფის ჯანმრთელობას საფრთხე ემუქრება.

"რა თქმა უნდა, არსებობდა ძალადობის ფაქტები, ამის დამადასტურებელია ის, რომ სისხლის სამართლის საქმეზე გამოძიება დაწყებულია, არაერთი საგამოძიებო მოქმედება ჩატარებული აქვს თბილისის პროკურატურას. ასევე, ელექტრონული ზედამხედველობა არის დაწესებული ორი ინსტანციის სასამართლოს მიერ, კანონიერ ძალაშია შესული ეს გადაწყვეტილება. შესაბამისად, ეს ცხადყოფს, რომ არსებობდა რეალური საფრთხე, რისკები იმისა, რომ მსხვერპლს შეჰქმნოდა სიცოცხლის და ჯანმრთელობის პრობლემები, სწორედ ამიტომ იყო დატოვებული თავის დროზე ელექტრონული ზედამხედველობა ძალაში და, შესაბამისად, ჩვენ დღეს ამ გადაწყვეტილებას ველოდებოდით, რომ შემაკავებელი ორდერი დარჩებოდა ძალაში," — თქვა სოფია სიგუას ადვოკატმა, თამარ ლუკავამ.

იოსებ სიგუას ადვოკატის, თეონა გვაზავას განცხადებით, მოსამართლეს შემაკავებელი ორდერი უნდა გაეუქმებინა და ამ გადაწყვეტილებას გაასაჩივრებენ.

"ზეპირი დასაბუთების მსვლელობის დროს მოსამართლემ ცალსახად განმარტა, რომ არ დასტურდება სოფიო სიგუას მიერ წარდგენილი არც ერთი ბრალდება და არ დასტურდება იოსებ სიგუას მხრიდან ძალადობის განხორციელების არც ერთი ფაქტი. მოსამართლის განმარტება მდგომარეობს შემდეგში, რომ პრევენციის მიზნით, მხოლოდ და მხოლოდ იმიტომ, რომ სისხლის სამართლის საქმეზე მიმდინარეობს გამოძიება, ამ მოტივით ტოვებს შემაკავებელ ორდერს ძალაში. ეს თავის მხრივ, ჩვენი შეფასებით, წარმოადგენს კანონის არსებით დარღვევას, რასაც, შესაბამისად, აუცილებლად გავასაჩივრებთ სააპელაციო წესით," — თქვა თეონა გვაზავამ.

გახმაურებულ საქმეზე იოსებ სიგუამ პირველი კომენტარი პროსამთავრობო ტელეკომპანია "იმედთან" გააკეთა. სიგუა მეუღლის ყველა ბრალდებას უარყოფს და მას რეპუტაციის შელახვაში ადანაშაულებს.

"სოფიას მიერ ჩემს მიმართ არის ძალიან მძიმე ბრალდებები წარდგენილი. ეგ ყველაფერი არის სიტყვიერი, რომელსაც კარგად ახერხებს და კარგად ლაპარაკობს, მაგრამ ეგ არის აბსურდი.

როგორ მიგაჩნიათ, ადამიანთან იცხოვრო 13 წელი, რომელიც ძალადობს, თითქმის ყოველ ორსულობაზე გცემს, გემუქრება, ძალადობს... და ამას ეხლა, ამხელ 13 წლის მერე, მანამდე თურმე ეშინოდა და ვერ ბედავდა... ეს არის ყოვლად აბსურდი.

ადამიანს თუ ესე ეშინია მეუღლის, არ წამოვა მასთან ერთად საზღვარგარეთ, არ დაისვენებს 10 დღე და მთელი წლის განმავლობაში შეიძლება სამჯერ წავსულიყავით სხვადასხვა ქვეყნებში.

სოფოს მიზანია, რომ ჩემს რეპუტაციაზე ზიანი მომაყენოს და ყველანაირად უნდა, რომ აი, ესე რაღაცნაირად გამანადგუროს," — განაცხადა სიგუამ.

სოფია სიგუა-შატბეროვამ მეუღლის წინააღმდეგ ბრალდებები თავდაპირველად "ნოდარ მელაძის შაბათში" 5 ივლისს გააჟღერა. მისი თქმით, იოსებ სიგუა მას სიცოცხლის მოსპობით და მე-12 სართულიდან გადაგდებით ემუქრებოდა, ერთხელ კი იარაღიც შუბლზე მიადო. სოფია სიგუა იმასაც ამბობდა, რომ ქმარი მას ორსულობის დროსაც სცემდა. იოსებ სიგუას 2026 წლის 21 თებერვალს შემაკავებელი ორდერიც გამოუწერეს.