წუხელ თბილისსა და საქართველოს რეგიონებში ელექტროენერგია სისტემურად გაითიშა — საქართველოს სახელმწიფო ელექტროსისტემას გათიშვის მიზეზის შესახებ ოფიციალური ინფორმაცია ჯერ არ გაუვრცელებია.

მათ მიერ გავრცელებულ განცხადებაში ნათქვამია, რომ არკვევენ დენის გათიშვის ზუსტ მიზეზს.

ქვეყნის მასშტაბით ელექტროენერგიის მიწოდება ავარიულად დაახლოებით 00:10 საათზე მოხდა. როგორც ირკვევა დენი გაითიშა ოკუპირებულ აფხაზეთში.

დე ფაქტო ხელისუფლების განცხადებით, რეგიონში ელექტროენერგიის გათიშვის მიზეზი "ენგურჰესზე მომხდარი სისტემური ავარია" გახდა.

“აფხაზეთი ელექტროენერგიის გარეშე დარჩა ენგურჰესზე მომხდარი სისტემური ავარიის გამო.

ამ დროისთვის მიმდინარეობს ოკუპირებული აფხაზეთისთვის ელექტროენერგიის მიწოდების ეტაპობრივი აღდგენის პროცესი.

დამატებითი ინფორმაცია მოგვიანებით გავრცელდება”, — დაწერა ტელეგრამ არხზე ოკუპირებლი აფხაზეთის ე.წ. ენერგეტიკის სამინისტრომ 00:47 წუთზე.

აღსანიშნავია, რომ ენგურჰესის დირექტორი ლევან მებონია "ტვ პირველთან" საუბრისას ამბობს, რომ ცდილობენ გაარკვიონ რა გახდა დენის სისტემური გათიშვის მიზეზი.

04:08 წუთზე ოკუპირებული აფხაზეთის ე.წ. სამინისტრო ტელეგრამის არხზე წერს, რომ ელექტროენერგიის მიწოდება ოკუპირებულ ტერიტორიაზე სრულად აღდგენილია. საქართველოს დანარჩენ რეგიონებში ელექტროენერგიის ეტაპობრივი აღდგენა გათიშვიდან დაახლოებით 2 საათში დაიწყო. ამ დროისთვის ზუსტი ინფორმაცია რომელ რეგიონებს აღუდგა ელექტროენერგია და სად არის ხარვეზი არ გვაქვს.

საქართველოს სახელმწიფო ელექტროსისტემის მონაცემებით, ელექტროენერგიის გათიშვის მიზეზთან დაკავშირებით ვრცელდება დეზინფორმაცია იმის შესახებ, რომ მასშტაბური გათიშვის მიზეზი, საქართველო-თურქეთის დამაკავშირებელ ელექტროგადამცემ ხაზზე მომხდარი ავარიაა.

ელექტროენერგიის გათიშვის ფონზე "ჯორჯიან უოთერ ენდ ფაუერმა" (GWP) გაავრცელა ცნობა, რომ ავტომატურად შეჩერდა ჯორჯიან უოთერ ენდ ფაუერის სატუმბო სადგურების ფუნქციონირება, რის გამოც თბილისის, რუსთავისა და მცხეთის მოსახლეობის ნაწილს შესაძლოა შეეზღუდოს ან დაბალი წნევით მიეწოდოს წყალი.

“კომპანიის ტექნიკური ჯგუფები საგანგებო რეჟიმში მუშაობენ, წყალმომარაგება სრულად აღდგება ჯივიპის სატუმბო სადგურებზე ელექტროენერგიის მიწოდებისთანავე”, — წერია GWP-ს განცხადებაში.

ენგურჰესი კავკასიაში ყველაზე დიდი ჰიდროელექტროსადგურია. ქართულ-აფხაზური კონფლიქტის შემდეგ მისი ინფრასტრუქტურა საქართველოსა და ოკუპირებული აფხაზეთის დე ფაქტო ხელისუფლების კონტროლის ქვეშ მოექცა: კაშხალი საქართველოს ხელისუფლების მიერ კონტროლირებად ტერიტორიაზე მდებარეობს, ხოლო მართვის პულტი — ოკუპირებული აფხაზეთის მიერ კონტროლირებულ გალის რაიონში. ამასთან, ენგურჰესის 100%-იანი წილი საქართველოს სახელმწიფოს საკუთრებაში რჩება. მოქმედი შეთანხმების თანახმად, ენგურჰესის მიერ გამომუშავებული ელექტროენერგიის 60% საქართველოს, ხოლო 40% ოკუპირებულ აფხაზეთს მიეწოდება.