უკრაინა 25-26 ივნისს, გდანსკში დაგეგმილი უკრაინის აღდგენის კონფერენციის ფარგლებში, ევროკავშირის 90 მილიარდიანი სასესხო პაკეტის პირველი, 3.2 მილიარდი ევროს ოდენობის ტრანშს მიიღებს. ამის შესახებ Ukrainska Pravda წერს European Pravda-ზე დაყრდნობით, რომელმაც ინფორმაცია ევროკავშირის მაღალჩინოსნისგან მოიპოვა.

"პირველი, 3.2 მილიარდი ევროს ტრანშის გადარიცხვა სპეციალურად დაემთხვა აღდგენის კონფერენციას, რომელიც 25-26 ივნისს გდანსკში გაიმართება", — განუცხადა ევროკავშირის წარმომადგენელმა გამოცემას.

მისივე თქმით, უკრაინისთვის პირველი ტრანშის გამოყოფის გადაწყვეტილება გასულ კვირას მიიღეს.

ევროკავშირის ოფიციალური პირის ინფორმაციით, ივნისის ბოლომდე მოსალოდნელია კიდევ ერთი, 5.9 მილიარდი ევროს ოდენობის ტრანშის გადარიცხვაც, რომელიც უკრაინის სამხედრო საჭიროებების დაფინანსებას მოხმარდება.

აღსანიშნავია, რომ უკრაინის აღდგენის კონფერენციაზე პოლონეთის პრეზიდენტი კაროლ ნავროცკი მიწვეული არ არის. ცნობისთვის, მანამდე, 19 ივნისს ნავროცკიმ ვოლოდიმირ ზელენსკის თეთრი არწივის ორდენი ჩამოართვა. მისი განმარტებით, პოლონეთი ევროკავშირში გაწევრიანების უფლებას არ მისცემს მათ, ვინც "ტოტალიტარიზმისა და ძალადობის კულტის უარყოფის აუცილებლობას" ვერ აცნობიერებს.

თავის მხრივ, ვოლოდიმირ ზელენსკიმ განაცხადა, რომ აღნიშნული გადაწყვეტილება პოლონეთის შიდა პოლიტიკასა და ანტიუკრაინული განწყობების გაღვივების მცდელობას უკავშირდება.