საქართველოს ახალგაზრდა იურისტთა ასოციაცია ტელეკომპანია "პირველის" "შაბათის ეთერში" გავრცელებულ ინფორმაციას ეხმიანება, რომლის თანახმადაც, ორ სხვადასხვა სისხლის სამართლის საქმეზე, სადაც დანაშაულის ჩადენაში პოლიციის თანამშრომლები არიან მხილებულნი, დაზარალებულებმა შესაბამის უწყებებს ბრალდებულების მიმართ პრეტენზიის არქონის შესახებ განცხადებით მიმართეს.

ორგანიზაცია პროკურატურასა და სასამართლოს მოუწოდებს, სავარაუდო წამებისა და არასათანადო მოპყრობის სხვა ფორმებთან დაკავშირებულ საქმეებში დაზარალებულთა პოზიცია შეაფასონ საჯარო ინტერესისა და სახელმწიფოს მიერ ასეთი დანაშაულების ეფექტიანი გამოძიების ვალდებულების გათვალისწინებით.

"საია ეხმიანება საჯარო წყაროებში გავრცელებულ ინფორმაციას იმასთან დაკავშირებით, რომ ორ სხვადასხვა სისხლის სამართლის საქმეზე, რომლებშიც დანაშაულის ჩადენაში მხილებულნი არიან პოლიციის თანამშრომლები, დაზარალებულმა პირებმა შესაბამის უწყებებს ბრალდებულთა მიმართ პრეტენზიის არქონის შესახებ განცხადებებით მიმართეს.

დაზარალებულს აქვს უფლება, მის მიმართ ჩადენილ დანაშაულთან დაკავშირებით ჰქონდეს სამართლებრივი პოზიცია, რომელიც შესაძლოა ბრალდებულთა მიმართ პრეტენზიის არქონაშიც გამოიხატებოდეს, თუმცა საეჭვო და შესაბამისი უწყებებისთვის საყურადღებო უნდა იყოს, რატომ აღარ აქვთ წამება/არასათანადო მოპყრობის მსხვერპლ პირებს ბრალდებულთა მიმართ პრეტენზია.

საია მოუწოდებს პროკურატურასა და სასამართლოს სავარაუდო წამებისა და არასათანადო მოპყრობის სხვა ფორმებზე დაზარალებულთა პოზიციები შეაფასოს საჯარო დევნის ინტერესის შესაბამისად.

საია გამოთქვამს მზადყოფნას, შესაბამისი სამართლებრივი კონსულტაცია გაუწიოს სახელმწიფო წარმომადგენელთა მხრიდან არასათანადო მოპყრობის მსხვერპლებს, რომლებიც შესაძლოა ბრალდებულთა ან მათი წარმომადგენლების მხრიდან განხორციელებული იძულების, დაშინების, უკანონო დაპირების ან სხვა სახის ზემოქმედების შედეგად იძულებულნი გახდნენ, უარი თქვან ან შეცვალონ საკუთარი სამართლებრივი პოზიცია ბრალდებულთა სასარგებლოდ", — წერია განცხადებაში.