ჩეჩნეთის ლიდერის, რამზან კადიროვის სამი ვაჟი — ახმატი, ელი და ადამი — საუდის არაბეთის პრინც თურქი ბინ მუჰამედ ალ საუდის შეხვდნენ და მისი დახმარებით სამეფო ტახტის მემკვიდრეს, მუჰამედ ბინ სალმანს გზავნილი გადასცეს. ინფორმაციას OC media ავრცელებს.

ამის შესახებ რამზან კადიროვმა საკუთარ Telegram-არხზე დაწერა, თუმცა გზავნილის შინაარსი არ გაუსაჯაროებია. ასევე არ დაკონკრეტებულა, რა განიხილეს უშუალოდ შეხვედრაზე: კადიროვმა მხოლოდ მექასა და მედინაში მომლოცველობასთან დაკავშირებული საკითხები ახსენა.

კადიროვის სამი ვაჟის გარდა, შეხვედრას ესწრებოდა მათი ბიძაშვილი ხამზატ კადიროვიც, რომელიც კადიროვის ადმინისტრაციის ხელმძღვანელის პოსტს იკავებს. ამავდროულად, შეხვედრას რესპუბლიკის მაღალჩინოსნებიდან არავინ დასწრებია. ჩეჩნეთის პრემიერმინისტრი მაგომედ დაუდოვი, რომელიც, როგორც წესი, თან ახლავს ხოლმე რამზან კადიროვს მსგავსი პროტოკოლური ვიზიტების დროს, ამჯერად შეხვედრაზე არ იმყოფებოდა.

რამზან კადიროვს საუდის არაბეთი, ბაჰრეინთან და არაბთა გაერთიანებულ საამიროებთან ერთად, არაერთხელ მოუხსენიებია "ძმურ" არაბულ ქვეყნად. OC media-ს ცნობით, ჟურნალისტები მანამდეც ვარაუდობდნენ, რომ სპარსეთის ყურის ეს სამი მონარქია კადიროვმა შესაძლოა განიხილოს პოტენციურ თავშესაფრად თავისი ოჯახისთვის, თუკი მას თანამდებობის დატოვება მოუწევს.

სპარსეთის ყურის ქვეყნების წარმომადგენლები რეგულარულად სტუმრობენ გროზნოს რელიგიურ და ჰუმანიტარულ ღონისძიებებში მონაწილეობის მისაღებად, ასევე სამშენებლო და ტურისტულ სფეროებში საინვესტიციო პროექტებისა და თანამშრომლობის განსახილველად. სხვადასხვა წლებში ახლო აღმოსავლეთის ქვეყნების დელეგაციები მონაწილეობდნენ ჩეჩნეთში გამართულ ისლამურ კონფერენციებსა და რელიგიურ ფორუმებში.

პრინცი თურქი ბინ მუჰამედ ალ საუდი ჩეჩნეთს 2018 წელსაც ესტუმრა, თუმცა არც იმ ვიზიტის დეტალები გახმაურებულა.