უკრაინის პრეზიდენტი ვოლოდიმირ ზელენსკი რუსეთის მიერ გასულ ღამეს განხორციელებულ მასშტაბურ საჰაერო იერიშს ეხმაურება, რომლის სამიზნეც უკრაინის არაერთი რეგიონი, მათ შორის დედაქალაქი გახდა. პრეზიდენტმა სოციალურ ქსელ X-ში განცხადება გამოაქვეყნა, სადაც მან განსაკუთრებული ყურადღება გაამახვილა კიევ-პეჩერის ლავრაზე მიტანილ იერიშზე, რომელიც მისი შეფასებით, ისტორიული და რელიგიური ძეგლის წინააღმდეგ მიმართული მძიმე დანაშაულია. მან ასევე ისაუბრა ხარკოვში დაფიქსირებულ რუსეთის "ტაქტიკაზე", როდესაც ოკუპანტები მაშველებზე განმეორებით დარტყმებს ახორციელებენ.

პრეზიდენტის თქმით, თავდასხმები განხორციელდა კიევის, დნიპროს, დონეცკის, ზაპოროჟიეს, სუმისა და მიკოლაევის ოლქებში. ზელენსკი ხაზს უსვამს, რომ რუსეთის აგრესია კიდევ ერთხელ ადასტურებს ომის გაგრძელების განზრახვას, რაზეც "დიდი შვიდეულის" (G7) ლიდერებმა, რომლებიც სამიტისთვის იკრიბებიან, ადეკვატური და გადამწყვეტი რეაგირება უნდა მოახდინონ.

"რუსული დარტყმების შედეგების ლიკვიდაციის სამუშაოები ამ წუთებშიც გრძელდება როგორც კიევში, ისე ხარკოვში. გასულ ღამეს რუსებმა მხოლოდ დედაქალაქის მიმართულებით 60-ზე მეტი რაკეტა გაუშვეს. ჯამში, უკრაინის წინააღმდეგ 70 რაკეტა და 611 დრონი გამოიყენეს. ამ დროის მონაცემებით, დედაქალაქში 28 ადამიანია დაღუპული. ვუსამძიმრებ მათ ოჯახებსა და ახლობლებს. კიევ-პეჩერის ლავრაზე განხორციელებულმა რუსულმა დარტყმამ ხანძარი გაუჩინა მიძინების ტაძარს, ეკლესიას, რომლის ისტორიაც XI საუკუნიდან იწყება. ეს არის ქრისტიანული კულტურის წინააღმდეგ რუსეთის მიერ დღემდე ჩადენილი ერთ-ერთი ყველაზე მძიმე დანაშაული. საგანგებო სიტუაციების სახელმწიფო სამსახურმა ტაძრის სახურავზე ხანძარი უკვე ჩააქრო. ხარკოვში რუსებმა განმეორებითი დარტყმა მიაყენეს ჩვენს მაშველებს, რომლებიც ინდუსტრიულ ობიექტზე წინა დარტყმის შედეგად გაჩენილ ხანძარს აქრობდნენ. სამწუხაროდ, ამ დროისთვის დადასტურებულია ხუთი ადამიანის დაღუპვა. ვუსამძიმრებ მათ ოჯახებსა და ახლობლებს. დაშავებულია ცხრა ადამიანი. დნიპროში რუსეთმა რკინიგზის სადგურის ტერიტორიას, კოლეჯსა და რამდენიმე საწარმოს დაარტყა .

თავდასხმის სამიზნე გახდა სხვა ქალაქები და დასახლებებიც. დარტყმის ქვეშ მოჰყვა კიევის, დნიპროს, დონეცკის, ზაპოროჟიეს, სუმისა და მიკოლაევის ოლქები. აი, ასე უჩვენებს რუსეთი მსოფლიოს თავის განზრახვას, გააგრძელოს ომი. ძალიან მნიშვნელოვანია, რომ ამაზე პასუხი გასცენ "დიდი შვიდეულის" (G7) ქვეყნებმა, რომლებიც ახლა სამიტზე იკრიბებიან — და ეს პასუხი იყოს გადამწყვეტი და არსებითი: მეტი ზეწოლა აგრესორზე და მეტი მხარდაჭერა უკრაინის საჰაერო თავდაცვისთვის, განსაკუთრებით ანტიბალისტიკური შესაძლებლობების კუთხით. მადლობას ვუხდი ყველას, ვინც გვეხმარება სიცოცხლის დაცვაში", — დაწერა ვოლოდიმირ ზელენსკიმ.

შეგახსენებთ, 15 ივნისის ღამეს რუსეთმა კიევზე ბალისტიკური რაკეტებით მორიგი იერიში მიიტანა, რის შედეგადაც, უკრაინის ერთ-ერთი უმნიშვნელოვანესი რელიგიური და კულტურული ძეგლი, კიევ-პეჩერის ლავრის ტერიტორიაზე მდებარე ისტორიული მიძინების ტაძარი დაზიანდა.

ოფიციალური პირების განცხადებით, რუსული თავდასხმის შედეგად კიევში რამდენიმე მრავალსართულიანი საცხოვრებელი კორპუსიც დაზიანდა. დედაქალაქში სულ მცირე ოთხი ადამიანი დაიღუპა და 30 დაშავდა, მათ შორის ორსული ქალი და ორი ბავშვი (5 და 6 წლის). ეს თავდასხმა რუსეთის სრულმასშტაბიანი ომის განმავლობაში ამ ძეგლზე განხორციელებული მეორე დარტყმაა.