დიუშენით დაავადებული ბავშვების მშობლები ირაკლი კობახიძეს შეხვდნენ. 2-საათიანი აუდიენციის შემდეგ, მშობლებმა ჟურნალისტებთან კომენტარი გააკეთეს.

ზაქრო გვიშიანმა ჟურნალისტებთან საუბრისას განაცხადა, რომ შეიქმნება სამუშაო ჯგუფი და მორიგი შეხვედრა ირაკლი კობახიძესთან, პარასკევს, 6 ივნისს შედგება. მისივე თქმით, შეხვედრას დაპირების ფორმა არ ჰქონია, მაგრამ იმედისმომცემი იყო. რაც შეეხება აქციებს, მშობლები ჯერ არ აკეთებ კომენტარს, გააგრძელებენ თუ არა კანცელარიასთან ღამის თენებას.

გვიშიანის განცხადებით, მშობლებმა კობახიძესთან "დაიცავი ილიაუნის" კამპანიაზეც ისაუბრეს და უთხრეს, რომ ამ პროცესების უკან არანაირი პოლიტიკური ძალა არ მდგარა.

"ჩვენ პოზიტიურად ვართ განწყობილი, რადგან ძალიან საჭირო და შინაარსიანი კითხვები იყო პრემიერმინისტრის მხრიდან, გავცვალეთ ინფორმაციები. ჩვენ ვხედავთ უკვე მზაობას, რომ ბატონი ირაკლი კობახიძე მაქსიმალურად მიიღებს ინფორმაციას და შევთანხმდით იმასთან დაკავშირებით, რომ შეიქმნება სამუშაო ჯგუფი. ჩვენ ისევ შევხვდებით და ცალკეულ საკითხებს გავივლით, რაც დღეს ვერ მოხერხდა.

ჩვენ ასევე მივაწოდეთ ინფორმაცია იმასთან დაკავშირებით, რომ ჩვენი პროცესები არ არის პოლიტიკურად მართული. ბუნებრივია, მშობლების ძირითადი მოთხოვნა არის მედიკამენტების მიღება. ის პროცესი, რომ საზოგადოებამ გამოხატა სოლიდარობა, ეს არ არის არავის მხრიდან მართული, ეს დაკავშირებულია მხოლოდ იმ პროცესებთან და იმ საჭიროებებთან, რაც აუცილებელია ამ ბავშვებთან მიმართებაში. არანაირი კომუნიკაცია ჩვენ არ გვქონდა ფარმაცევტულ კომპანიებთან და ძალიან ცუდად ჟღერდებოდა ეს, რომ თითქოს ფარმაცევტული მაფიის მართულები იყო რომელიმე მშობელი ან ორგანიზაცია და ამ კითხვებსაც გაეცა პასუხი. [...]

დაპირების ფორმა ამ შეხვედრას არ ჰქონდა და ვერც იქნებოდა და ამის მოლოდინი არ გვქონია ჩვენ და არც ამის განწყობა, რომ დაპირებით, კონკრეტული გადაწყვეტილებით გამოვიდოდით ამ შეხვედრიდან, მაგრამ რაც ვთქვი — ეს იყო მართლაც იმედისმომცემი შეხვედრა, რაც აქამდე გვქონია ჩვენ ჯანდაცვის სამინისტროსთან, ცალკეულ პირებთან.
რაც შეეხება ღამისთევას და ამ ფორმატში გაგრძელებას, ჩვენ დავილაპარაკებთ. მარტო ჩვენ ვერ მივიღებთ გადაწყვეტილებას. თითოეულ ორგანიზაციის წევრთან გავივლით ამ საკითხს და შემდგომში გავაჟღერებთ ამას. ასევე გეტყვით, რომ დღევანდელ შეხვედრას ესწრებოდა ჯანდაცვის მინისტრი და საერთოდ არ ყოფილა საუბარი მედიკამენტების უკუჩვენების და უსაფრთხოების თაობაზე" — განაცხადა ზაქრო გვიშიანმა.

შეგახსენებთ, დიუშენით დაავადებული ბავშვების მშობლები ირაკლი კობახიძესთან შეხვედრის მოთხოვნით კანცელარიის შენობასთან 45 ღამე გაათენეს.