საფეხბურთო კლუბ საჩხერის ჩიხურას კუთვნილი მიკროავტობუსი გზის სავალი ნაწილიდან გადავიდა და ამოტრიალდა. შემთხვევა ხაშურთან, ავტობანზე მოხდა.

მიკროავტობუსში მყოფი ფეხბურთელებიდან ერთ-ერთი დაშავდა, რომელიც ამ დროისთვის საავადმყოფოში იმყოფება.

შინაგან საქმეთა სამინისტროში On.ge-ს განუცხადეს, რომ სერიოზულად არავინ დაშავებულა და აქედან გამომდინარე გამოძიებაც არ დაწყებულა.

რუსთავი 2-თან საუბრისას კი ტრავმატოლოგიური ჰოსპიტლის სამედიცინო დირექტორმა ბუბა შალამბერიძემ განაცხადა, რომ დაშავებულ ფეხბურთელს დაუდგინდა მარჯვენა ლავიწის ძვლის სამხრე ბოლოს მოტეხილობა, მცირე ცდომით და ჩაუტარდა ოპერაცია ლავიწის ძვლის ოსტეო სინთეზი. მისივე თქმით, სხვა, სიცოცხლისათვის საშიში დაზიანებები პაციენტს არ აქვს.