ლონდონში მზია ამაღლობელთან და საქართველოში მედიის მდგომარეობასთან დაკავშირებით დისკუსია გაიმართა. მაგნიტსკის სამართლიანობის გლობალური კამპანიის ხელმძღვანელმა, "მაგნიტსკის აქტის" მიღების ინიციატორმა ბილ ბრაუდერმა დიდი ბრიტანეთის ხელისუფლებისგან ქართული ოცნების საპატიო თავმჯდომარის, ბიძინა ივანიშვილის დასანქცირება მოითხოვა. მისი თქმით, "მაგნიტსკის აქტი" იმისთვის შეიქმნა, რომ "მთელი ქვეყნის მოსახლეობის დასჯის ნაცვლად, მიზანში ამოვიღოთ ის კონკრეტული ოლიგარქები, რომლებიც ადამიანის უფლებებს არღვევენ".

"არსებობს ეს კაცი — ივანიშვილი, ოლიგარქი და მილიარდერი, რომელსაც ფული მთელ მსოფლიოში აქვს მიმოფანტული. საერთოდ, რატომ შეიქმნა "მაგნიტსკის აქტი"? სწორედ იმისთვის, რომ მთელი ქვეყნის მოსახლეობის დასჯის ნაცვლად, მიზანში ამოვიღოთ ის კონკრეტული ოლიგარქები, რომლებიც ადამიანის უფლებებს არღვევენ.

მას აქტივები გაერთიანებულ სამეფოშიც აქვს. 2025 წლის ბოლოს, სენატორ კარდინის გამოსამშვიდობებელ მოსმენაზე, სენატის საგარეო ურთიერთობათა კომიტეტს ჩვენება მივეცი "მაგნიტსკის აქტის" შესახებ, სადაც ვისაუბრე ივანიშვილისა და იმის შესახებ, თუ როგორ უნდა გამოვიყენოთ ეს აქტი მის წინააღმდეგ. შემდგომში ამერიკის შეერთებულმა შტატებმა ის დაასანქცირა და, დარწმუნებული ვარ, ეს ფაქტი მას სერიოზულ დისკომფორტს უქმნის.

თუმცა, როგორც ჩანს, მას აქტივები დიდ ბრიტანეთშიც აქვს, რომელსაც ის ჯერ არ დაუსანქცირებია. დიახ, დიდ ბრიტანეთს ის ჯერ არ დაუსანქცირებია. ამაზე უნდა დავიწყოთ მუშაობა და, რეალურად, ეს ძალიან მარტივი საქმეა. თუ გაერთიანებულ სამეფოს მცირედით მაინც სწამს ადამიანის უფლებების, პრესის თავისუფლებისა და იმ ყველაფრის, რის ერთგულებაზეც ბრიტანეთის მთავრობა მუდმივად საუბრობს, მათ უნდა დაასანქცირონ ივანიშვილი და ყველა ის მოსამართლე თუ პროკურორი, რომლებიც მზიას უკანონო, არაადამიანურ და უფლებადამრღვევ პატიმრობაში არიან ჩართულნი.

ამის მიღწევა მარტივია. თუ მას აქტივები ნამდვილად აქ (ბრიტანეთში) აქვს, როგორც წამიკითხავს, მსგავსმა ნაბიჯმა ის უნდა გამოაფხიზლოს და დააფიქროს. ბოლოს მინდა ვთქვა: რაც არ უნდა უიმედოდ ჟღერდეს ეს ყველაფერი, რეალურად, ეს ერთ-ერთი შედარებით მარტივი შემთხვევაა — არა უშალოდ მზიას, არამედ, ზოგადად, საქართველოს საკითხი. ეს გაცილებით მარტივი საქმეა, ვიდრე რუსეთის ან ირანის შემთხვევა. საქართველო პატარა ქვეყანაა, რომელიც გეოპოლიტიკური ქარტეხილების ეპიცენტრშია. ეს არ არის სახელმწიფო, რომელიც მყარად დგას ფეხზე და შეუძლია მსგავსი საშინელებები უსასრულოდ გააგრძელოს.

...ვფიქრობ, მოკლევადიან პერსპექტივაში ჩვენი ამოცანაა, ვიბრძოლოთ მსხვერპლთათვის და მოვითხოვოთ სანქციები დამნაშავეების წინააღმდეგ. თუმცა, ამავდროულად, წინ უნდა ვიყუროთ და გვესმოდეს, რომ ეს ყველაფერი სამუდამოდ ვერ გაგრძელდება. შეხედეთ ფილიპინებს: ]დუტერტე [დიქტატორი მარია რესას წიგნიდან: “როგორ დავამარცხოთ დიქტატორი”] უამრავ საზიზღრობას სჩადიოდა, ახლა კი მას სისხლის სამართლის საერთაშორისო სასამართლოსთან (ICC) უწევს გამკლავება. ვფიქრობ, ამჟამად საქართველოს შემთხვევა უფრო დიდი ალბათობით სწორედ ფილიპინების გზას გაივლის, ვიდრე ირანის ან რუსეთისას", — განაცხადა ბრაუდერმა (კომენტარს "ნეტგაზეთი" ავრცელებს).