საგარეო უწყების ხელმძღვანელმა მაკა ბოჭორიშვილმა სამთავრობო ტელეკომპანია "იმედის" ეთერში განაცხადა, რომ უახლოეს მომავალში შედგება შეხვედრა უკრაინულ მხარესთან, სადაც განიხილავენ ორ ქვეყანას შორის ურთიერთობების ნორმალიზების საკითხს.

"ნამდვილად გააქტიურდა უკრაინული მხარე საქართველოსთან კომუნიკაციაში. დღეს [6 მაისს] შედგა სატელეფონო საუბარი ჩემს კოლეგასთან და შევთანხმდით, რომ გავაგრძელებთ ურთიერთობას. ძალიან დიდი ხნის განმავლობაში უკრაინული მხარე საქართველოს და ქართულ საზოგადოებას სოციალური ქსელებით ესაუბრებოდა და არც თუ ისე სასიამოვნო გზავნილები გვესმოდა, რაც შეუძლებელია, რომ გადავდოთ გვერდით. მნიშვნელოვანია, რომ ინიციატივა მოდის უკრაინული მხარისგან, რაც შეიძლება განვიხილოთ, როგორც პოზიტიური ნაბიჯი. მეორეს მხრივ, ჩვენი მხრიდანაც მნიშვნელოვანია, რომ ამ წლების განმავლობაში ურთიერთობებში დაგროვილი საკითხები უკრაინული მხარისგან იყოს სწორად გაგებული, ისე, როგორც გავიგეთ ჩვენ — ქართულმა საზოგადოებამ, საქართველოს ხელისუფლებამ, და გავაგრძელოთ ურთიერთობა. შევთანხმდით, რომ ცოტა ხანში გვექნება შეხვედრა და შევძლებთ მსჯელობას, თუ რა შეიძლება გაკეთდეს იმისთვის, რომ ორი ქვეყნის ურთიერთობები დაბრუნდეს ნორმის ჩარჩოებში," — განაცხადა მაკა ბოჭორიშვილმა.

მანამდე ორი ქვეყნის საგარეო უწყების ხელმძღვანელების სატელოფო საუბარზე ინფორმაცია გაავრცელა საგარეო უწყებამ და უკრაინის საგარეო უწყების ხელმძღვანელმა ანდრეი სიბიჰაგამაც.

საგარეო უწყების ცნობით, 6 მაისს მხარეებს შორის კომუნიკაცია უკრაინული მხარის ინიციატივით გაიმართა.

საუბრისას განხილულ იქნა საქართველო-უკრაინის ურთიერთობები, ხაზი გაესვა დიალოგის მნიშვნელობას და ამ მიმართულებით შემდგომ ნაბიჯებს, — ეწერა საგარეო უწყების მიერ გავრცელებულ ინფორმაციაში.

ამის შემდეგ სატელეფონო საუბრის დეტალებზე უფრო ვრცლად დაწერა სოციალურ ქსელში უკრაინის საგარეო უწყების ხელმძღვანელმა. სიბიჰას თქმით, მხარეების "უკრაინა-საქართველოს ურთიერთობების ნორმალიზების ორმხრივ ინტერესზე შევთანხმდით".

"მოხარული ვარ, რომ ერევანში ბოლო დროს გამართული კონტაქტების შემდეგ, ჩემს ქართველ კოლეგა მაკა ბოჭორიშვილთან დიალოგი გავაგრძელე.

დღევანდელი სატელეფონო საუბრის დროს აღვნიშნეთ ჩვენს ქვეყნებს შორის კონსტრუქციული დიალოგი და შევთანხმდით უკრაინა-საქართველოს ურთიერთობების ნორმალიზების ორმხრივ ინტერესზე.

ვისაუბრეთ ორმხრივ ურთიერთობებსა და საერთაშორისო ორგანიზაციებში ურთიერთქმედებაზე. ასევე დავადასტურეთ ჩვენი გახსნილობა ორმხრივი თანამშრომლობის წინსვლისა და აქტიური კონტაქტების შენარჩუნების მიმართ", — დაწერა სიბიჰამ.

საგარეო უწყების ხელმძღვანელის განცხადებით, მისასალმებელია უკრაინული მხარის სურვილი ურთიერთობების ნორმალიზებასთან დაკავშირებით, ამასთან, აუცილებელია ეს ურთიერთობები პატივისცემაზე იყოს დაფუძნებული.

"უკრაინული მხარის სურვილი და პოზიტიური მოლოდინი, რომელიც უკავშირდება ურთიერთობის ნორმალიზებას, მხოლოდ და მხოლოდ, მისასალმებელია. ამიტომაც შედგა ეს კომუნიკაცია და სატელეფონო საუბარი, რათა ვცადოთ, რომ პატივისცემაზე დაფუძნებული ურთიერთობების გავაგრძელოთ. არასდროს გვისურვია არცერთს მეგობარ სახელმწიფოსთან და ხალხთან სხვაგვარი ურთიერთობა. თუკი ასეთი სურვილი იქნება მეორე მხრიდანაც და შესაბამისი ნაბიჯებიც გადაიდგმება, მოხარული ვიქნებით," — განაცხადა მაკა ბოჭორიშვილმა "იმედის" ეთერში.

• უკრაინული მედია: ზელენსკი პირველად შეხვდა უკრაინის მიერ დასანქცირებულ ირაკლი კობახიძეს
• "ზელენსკისთან იყო მეგობრული და საინტერესო საუბარი, უკრაინა არის ჩვენთვის მეგობარი ქვეყანა" — ირაკლი კობახიძე ზელენსკითან შეხვედრაზე