აშშ-ის სახელმწიფო მდივანმა მარკო რუბიომ სამშაბათს განაცხადა, რომ ირანის წინააღმდეგ აშშ-ის სამხედრო ოპერაცია დასრულებულია. მან ერთმანეთისგან გამიჯნა აღნიშნული ოპერაცია და აშშ-ის სამხედრო-საზღვაო ძალების ახალი ინიციატივა, რომელიც ჰორმუზის სრუტეში კომერციული ხომალდების უსაფრთხო ნავიგაციასა და მათ გაცილებას გულისხმობს.

"ოპერაცია დასრულებულია. როგორც პრეზიდენტმა კონგრესს აცნობა, ოპერაცია "ეპიკური რისხვა" უკვე დასრულებულია. ახლა ჩვენ გადავდივართ ახალ ფაზაზე — "პროექტ თავისუფლებაზე", — განუცხადა რუბიომ ჟურნალისტებს

პრეზიდენტმა ტრამპმა გასულ პარასკევს აცნობა კონგრესს, რომ თეირანის წინააღმდეგ კინეტიკური მოქმედებების შესახებ პირველი შეტყობინებიდან 60 დღის შემდეგ, ირანთან გაფორმებული ცეცხლის შეწყვეტის შეთანხმება ნიშნავდა, რომ მას არ გადაუჭარბებია 1973 წლის "ომის უფლებამოსილების შესახებ აქტით" განსაზღვრული 60-დღიანი ვადისათვის.

კონგრესისთვის გაგზავნილ წერილში ტრამპმა ასევე აღნიშნა, რომ 7 აპრილს დაწყებულ ზავის პერიოდში ომი "დასრულდა".

ამის შემდეგ ტრამპმა გასცა ოპერაცია "თავისუფლების" დაწყების ნებართვა, თუმცა დაძაბულობა კვლავ გამწვავდა მას შემდეგ, რაც ორშაბათს ირანულმა მხარემ რეგიონში მყოფ აშშ-ის სამხედრო ხომალდებს ცეცხლი გაუხსნა. ადმირალ ბრედ კუპერის ინფორმაციით, ამერიკელმა სამხედროებმა საპასუხო იერიშით ექვსი ირანული მცირე ზომის კატარღა გაანადგურეს.

ირანის პარლამენტის სპიკერმა მოჰამედ ბაღერ გალიბაფმა სამშაბათს განაცხადა, რომ ტრამპის ოპერაცია "თავისუფლება" და საზღვაო ბლოკადა, რომელიც კვლავ ძალაში რჩება, ცეცხლის შეწყვეტის შეთანხმების დარღვევას წარმოადგენს.

აშშ-ის არმიის გაერთიანებული შტაბების ხელმძღვანელმა, გენერალმა დენ კეინმა სამშაბათს დილით, პენტაგონში, ჟურნალისტებს განუცხადა, რომ არაბეთის ყურეში, ირანის სამხედრო ძალების მიერ საზღვაო გემებზე დაწესებული შეზღუდვების გამო, 1 550-ზე მეტ კომერციულ გემზე მყოფი დაახლოებით 22 500 მეზღვაური "ხაფანგშია" მოქცეული.

"ცხადია, ეს სრულად ვერ გადაჭრის სრუტეების პრობლემას, თუმცა დიდწილად მოაგვარებს მას. ახლა მთავარია, სათანადო პასუხი გაეცეს იმას, რასაც ირანი ამჟამად სჩადის"," — დასძინა რუბიომ სამშაბათს.

შეგახსენებთ, 28 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური რისხვა" ეწოდა. აშშ-ს პრეზიოდენტმა, დონალდ ტრამპმა ისლამური რესპუბლიკის ბირთვული პროგრამის განადგურების განზრახვის შესახებ გამოაცხადა. იერიშები მიზნად ისახავდა და ისახავს რეჟიმის შეცვლას. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.