საერთაშორისო სარეიტინგო სააგენტო — Fitch Ratings-მა ბაზისბანკისა და ლიბერთის რეიტინგის პროგნოზი პოზიტიურ დონემდე გააუმჯობესა, ხოლო გრძელვადიანი დეფოლტის რეიტინგი (IDR) 'B+'-ზე დაადასტურა. რეიტინგის ცვლილება უკავშირდება ბაზისბანკის მიერ ლიბერთის აქციების 95.99%-იანი წილის წარმატებულ შეძენას.

Fitch Ratings-ის განმარტებით, ბაზისბანკის მიერ ლიბერთის შესყიდვა ორჯერ მეტად ზრდის ბანკის ზომას და მას სექტორში სიდიდით მესამე უმსხვილეს ბანკად აყალიბებს. პოზიტიური პროგნოზი ასახავს Fitch-ის მოლოდინს, რომ აღნიშნული ტრანზაქციის შედეგად მნიშვნელოვნად მოიმატებს გაერთიანებული ჯგუფის ბიზნესის მასშტაბები, გაძლიერდება კონკურენცია და დივერსიფიკაცია საქართველოს საფინანსო ბაზარზე.

“Fitch-ის მიერ ბაზისბანკისა და ლიბერთის რეიტინგის პროგნოზის პოზიტიურ დონემდე გაზრდა არის მნიშვნელოვანი აღიარება იმ სტრატეგიული ნაბიჯისა, რომელიც ლიბერთის შესყიდვით გადავდგით. ეს გადაწყვეტილება ადასტურებს, რომ ჩვენი ერთობა ქმნის მძლავრ, დივერსიფიცირებულ და მაღალკონკურენტულ ფინანსურ ინსტიტუტს“, — Fitch-ის მიერ რეიტინგის პროგნოზის გაუმჯობესებასთან დაკავშირებით, აღნიშნა ბაზისბანკისა და ლიბერთის გენერალურმა დირექტორმა, დავით ცაავამ.