"წესდება შესაცვლელია, შეზღუდვები არ უნდა იყოს არც სასულიერო ტიტულზე, არც წლოვანებაზე" — აღნიშნა ურბნისისა და რუისის ეპარქიის მიტროპოლიტმა და პატრიარქობის კანდიდატმა, მეუფე იობმა ჟურნალისტებთან საუბრისას, რომლის ჩანაწერსაც "ქართლის ამბები" ავრცელებს.

მეუფე იობმა განაცხადა, რომ სინოდის სხდომაზე საკუთარი პოზიცია ღიად დააფიქსირა და მხარს უჭერდა, რომ საპატრიარქო არჩევნებში მონაწილეობა მიეღო მეუფე დანიელსაც და მეუფე ისაიასაც.

"წესდება ითვალისწინებდა ამას, მაგრამ, მე ვფიქრობ, რომ ეს წესდება შესაცვლელი არის და ალბათ, უნდა შევცვალოთ მომავალში. იმიტომ, რომ ეს შეზღუდვები არც უნდა იყოს სასულიერო ტიტულთან დაკავშირებით, არც წლოვანებასთან დაკავშირებით.

რა თქმა უნდა... მინდოდა, რომ მიეღო მონაწილეობა მეუფე დანიელსაც და მეუფე ისაიასაც," — განაცხადა პატრიარქობის კანდიდატმა.

ინტერვიუში მან ეკლესიის მომავალ განვითარებაზეც ისაუბრა და განაცხადა, რომ აუცილებელია მასშტაბური რეფორმები. ერთ-ერთ მნიშვნელოვან მიმართულებად მეუფე იობმა რუის-ურბნისის საეკლესიო კრების ჩატარება დაასახელა.

"ცვლილებები უნდა მოხდეს აუცილებლად. რეფორმები უნდა გატარდეს ძალიან ბევრი მიმართულებით.

ჩვენ გვაქვს რუის-ურბნისის კრება აუცილებლად უნდა ჩატარდეს მომავალში, როცა ამისთვის მზად ვიქნებით," — თქვა მიტროპოლიტმა.

ამასთან, ჟურნალისტის კითხვაზე, ფიქსირდება თუ არა ეკლესიაში საგარეო ჩარევები, მეუფემ უპასუხა, რომ ასეთი შემთხვევები არის.

"ფაქტიურად ეს ყველამ ვიცით, რომ არის შემთხვევები და ხდება კიდეც. ზეწოლაც ხდება და ჩარევებიც", — დასძინა მან.

ჟურნალისტებთან საუბრისას მიტროპოლიტმა იობმა მისი დიპლომის დაკარგვის შესახებაც ისაუბრა და თქვა, რომ "საერო დიპლომიც დაკარგულია და სასულიეროც".

"როცა დამირეკეს საპატრიარქოდან, მეუფე თეოდორემ მითხრა — აუცილებლად წარმოადგინეთ თქვენი სასულიერო სასწავლებლის დამთავრების დიპლომი, როცა წავედი სადაც ვიცოდი რომ იყო და იქ აღარ იყო.

მე ჩემი თვალით ვნახე. საერო დიპლომიც დაკარგულია და სასულიეროც, მაგრამ დღესდღეობით აღდგენილი არის უკვე", — აღნიშნა მან.

ცნობისთვის, მეუფე იობმა წერილობითი თხოვნით მიმართა თბილისის სასულიერო აკადემიისა და სემინარიის რექტორს, პროტოპრესვიტერ გიორგი ზვიადაძეს, რათა მცხეთის სასულიერო სემინარიაში მიღებული განათლების შესაბამისად მისცემოდა დიპლომის ასლი.

საქართველოს საპატრიარქოს საზოგადოებასთან ურთიერთობის სამსახურის ცნობით, კომისიამ მტკიცებულებებისა და მოწმეთა ჩვენებების საფუძველზე, აღიარა მიტროპოლიტ იობის მიერ მიღებული განათლება და მას თეოლოგიის ბაკალავრის აკადემიური ხარისხი მიანიჭა

შეგახსენებთ, 28 აპრილს საპატრიარქოში სინოდის სხდომა გაიმართა, სადაც პატრიარქობის 3 კანდიდატი შეირჩა.

საპატრიარქოს საზოგადოებასთან ურთიერთობის სამსახურის ხელმძღვანელმა დეკანოზმა, ანდრია ჯაღმაიძემ ჟურნალისტებთან საუბრისას განაცხადა, რომ სინოდის წევრებმა კანდიდატებად მოსაყდრე შიო (მუჯირი), მეუფე იობი (აქიაშვილი) და მეუფე გრიგოლი (ბერბიჭაშვილი) აირჩიეს. მისი განმარტებით, ხმათა უმრავლესობა (20 ხმა) მოსაყდრე შიომ, ხოლო დანარჩენმა ორმა კანდიდატმა 7-7 ხმა მიიღეს.