დღეს თბილისის საქალაქო სასამართლოში გელა ხასაიას სასამართლო პროცესი გაიმართა, სადაც დაზარალებული რამაზ ჩადუნელი დაიკითხა.

ნეტგაზეთის ინფორმაციით, ჩადუნელმა სასამართლო პროცესზე 1-ელი სექტემბრის ღამე გაიხსენა. მისი განმარტებით, გამთენიისას დეზერტირების ბაზრის სიახლოვეს სეირნობდა, როდესაც 2 ახალგაზრდა კაცი გაიცნო და მათთან ერთად დალია. მოგვიანებით ამ ორ ახალგაზრდას გელა ხასაია შეუერთდა. დაზარალებული სასამართლო პროცესზე თავდასხმის დეტალებს ვერ იხსენებდა — მხოლოდ ის ახსოვდა, რომ თავდასხმის დროს "აღმოჩნდა რომ ხელი მოიტეხა". ჩადუნელმა შემდეგ დააკონკრეტა, რომ არ იცის გამომძიებელმა მისი რა ჩვენება ჩაიწერა და მხოლოდ სასამართლო პროცესზე მიცემული ჩვენებაა სიმართლე.

რამაზ ჩადუნელმა სასამართლო პროცესზე გელა ხასაიას ამოცნობა ვერ შეძლო. პუბლიკას ინფორმაციით, ჩადუნელი თავდაპირველად დამსწრე საზოგადოებას აკვირდებოდა, ხოლო შემდეგ მხოლოდ ვასილ ქერდიყოშვილის ამოცნობა შეძლო.

შემდეგ ჩადუნელმა დასძინა, რომ არ იქნება წინააღმეგი, თუ ბრალდებულებს კანონით გათვალისწინებული შეღავათები შეეხებათ.

ცნობისთვის, ვასილ ქერდიყოშვილს გელა ხასაიასთან ერთად რამაზ ჩადუნელზე თავდასხმა ედება ბრალად — ქერდიყოშვილმა 2025 წლის 20 ნოემბერს პროკურატურასთან საპროცესო შეთანხმება გააფორმა.

გელა ხასაია 29 სექტემბერს, გვიან ღამით დააკავეს. სასამართლო გელა ხასაიას და ვასილ ქერდიყოშვილს ჯგუფურ ძალადობას ედავება. პროკურატურის განმარტებით, ხასაიამ და ქერდიყოშვილმა ვაგზლის მოედნის მიმდებარე ტერიტორიაზე, რამაზ ჩადუნელს ჯანმრთელობის დაზიანება მიაყენეს — მიუხედავად ჯგუფური ძალადობის მუხლისა, ბრალდებულები აცხადებენ, რომ ერთმანეთს არ იცნობენ. 3 დეკემბერს, ვასილ ქერდიყოშვილმა ბრალი აღიარა და პროკურატურასთან საპროცესო შეთანხმებაზე მუშაობს.

გელა ხასაია დღემდე არ აღიარებს ბრალს, მას 4-დან 6 წლამდე თავისუფლების აღკვეთას ემუქრება.