იუსტიციის სამინისტროს მიერ ინიცირებული კანონპროექტი, რომლითაც სოციალურ მუშაკს უფლება ეძლევა, ბავშვი ნებისმიერი მოძალადისგან განაცალკევოს, პარლამენტმა მესამე მოსმენით მიიღო. ოჯახში ძალადობის აღკვეთის, ოჯახში ძალადობის მსხვერპლთა დაცვისა და დახმარების შესახებ საქართველოს კანონში შესულ ცვლილებას 74-მა დეპუტატმა დაუჭირა მხარი. აქამდე ბავშვის მოძალადისგან განსაცალკევებლად სასამართლოს გადაწყვეტილება იყო საჭირო.

ცვლილების მიხედვით, მშობლის გარდა, მოძალადედ შეიძლება ჩაითვალოს ნებისმიერი სხვა პირი, რომელიც ბავშვზე ძალადობს სხვადასხვა ფორმით.

"ქუჩაში მცხოვრებ და მომუშავე ბავშვების მიმართ განხორციელებულ ძალადობის შემთხვევაში, ხშირად, შეუძლებელია იმის დადგენა, მოძალადე არასრულწლოვნის მშობელია, თუ სხვა კანონიერი წარმომადგენელი. სწორედ ასეთი შემთხვევისათვის მნიშვნელოვანია, საკანონმდებლო დონეზე სოციალურ მუშაკს ჰქონდეს უფლებამოსილება, მშობლისა და სხვა კანონიერი წარმომადგენლის გარდა, სხვა პირის მიერ ბავშვზე ძალადობის შემთხვევაში, მოახდინოს რეაგირება და არასრულწლოვანი განაცალკევოს მოძალადისაგან", - ნათქვამია კანონპროექტის განმარტებით ბარათში.