ირაკლი კობახიძემ, ჟურნალისტებთან საუბრისას გერმანიის ადმინისტრაციის ქმედებები გააკრიტიკა. მისი განცხადებით, გერმანული მხარე საკუთარ თავს კომიკურ მდგომარეობაში იგდებს, როდესაც უარს ამბობს საკუთარ ვებგვერდზე საქართველოს პრეზიდენტთან დაკავშირებული ფორმალური ინფორმაციის შეცვლაზე. კობახიძის განმარტებით, შექმნილი ვითარება იმდენად აბსურდულია, რომ მას კრიტიკაც კი არ სჭირდება.

"კომიკურ მდგომარეობაში იგდებს საკუთარ თავს გერმანული ადმინისტრაცია, როდესაც პრეზიდენტთან დაკავშირებით ფორმალური ინფორმაციის შეცვლაც კი არ სურს საკუთარ ვებგვერდზე. ამას კრიტიკაც კი არ სჭირდება, უბრალოდ, კომიკურია ეს მდგომარეობა, რასაც ჩვენ ვხედავთ", — განაცხადა კობახიძემ.

აღნიშნული განცხადება უკავშირდება გერმანული უწყებების პოზიციას, რომლებიც სალომე ზურაბიშვილის სტატუსთან დაკავშირებით ოფიციალური მონაცემების კორექტირებას არ ჩქარობენ.

შეგახსენებთ, საგარეო უწყების ხელმძღვანელმა, მაკა ბოჭორიშვილმა სამთავრობო ტელეკომპანია "რუსთავი 2"-ის ეთერში გერმანიის საგარეო საქმეთა სამინისტრო აასევე გააკრიტიკა იმის გამო, რომ მეორე წელია მათ ვებგვედზე საქართველოს პრეზიდენტად კვლავ სალომე ზურაბიშვილია მითითებული და საგარეო საქმეთა მინისტრად ილია დარჩიაშვილი. მისი თქმით, ამას "ვერ მიიღებენ, როგორც ტექნიკურ ხარვეზს. არ არის ძალიან რთული ორი გვარის ჩასწორება".

მანამდე, მიმდინარე წლის 13 თებერვალს, შალვა პაპუაშვილმაც გააკრიტიკა გერმანული მხარე და კონკრეტულად ელჩი პეტერ ფიშერი, რომ ეს "ხარვეზი" ამ დრომდე არ გასწორებულა. მისი თქმით, "ეს არ არის რომელიმე ვებ-ადმინისტრატორის ხარვეზი. შეუძლია გერმანიის ელჩს, რომ შეასწოროს".