დასავლეთ ინდონეზიაში მატარებლების შეჯახების შედეგად სულ მცირე 14 ადამიანი დაიღუპა, ხოლო 84 დაშავდა — ინფორმაციას ქვეყნის რკინიგზის ოპერატორზე დაყრდნობით Sky News ავრცელებს.

მატარებლები ერთმანეთს ორშაბათს გვიან ღამით, ქალაქ ბეკასიში შეეჯახენ.

ქვეყნის სამძებრო-სამაშველო სააგენტოს ხელმძღვანელმა, მოჰამედ სიაფიმ, პრესკონფერენციაზე განაცხადა, რომ დაზიანებული ვაგონებიდან გადარჩენილების ამოყვანა საკმაოდ რთული და საფრთხილო პროცესია.

"ადგილზე ამ წუთებშიც არიან დაზარალებულები. ჩვენ მათი გადარჩენის იმედი გვაქვს, თუმცა ისინი კვლავ მატარებლის ნამსხვრევებს შორის არიან მოყოლილები", — აღნიშნა მან.

Sky News წერს, რომ ინდონეზიაში სახმელეთო ტრანსპორტის ავარიები ხშირია. 2024 წელს დასავლეთ იავის პროვინციაში მომხდარმა კიდევ ერთმა სარკინიგზო შეჯახებამ ოთხი ადამიანი იმსხვერპლა, ათობით კი — დაშავდა.