აზერბაიჯანელმა ჟურნალისტმა, აფგან სადიგოვმა ASAN Xidmət-ის ცენტრს უცხოეთის პასპორტის მისაღებად მიმართა. ამის შესახებ ჟურნალისტის მეუღლე, სევინჩ სადიგოვი სოციალურ ქსელში წერს.

მისივე ინფორმაციით, განაცხადი უკვე დარეგისტრირებულია და სადიგოვი 1-ელ მაისს პასპორტის ასაღებად აზერბაიჯანის სახელმწიფო სერვისის – ASAN-ის ცენტრს მიმართავს.

სევინჩ სადიგოვის თქმით, ეს პროცესი მნიშვნელოვან ეტაპს წარმოადგენს ოჯახის გაერთიანების გზაზე.

"მიუხედავად დიდი ხნის განმავლობაში ხელოვნურად შექმნილი სამართლებრივი დაბრკოლებებისა, აღძრული სისხლის სამართლის საქმისა, გაუმართლებელი ძებნის ბრძანებისა და მიმდინარე პოლიტიკური ზეწოლისა, ჩვენ საბოლოოდ გადავდგით კიდევ ერთი კანონიერი ნაბიჯი ჩვენი ოჯახის გაერთიანებისკენ," — განაცხადა მან.

როგორც სადიგოვი წერს, აზერბაიჯანელ ჟურნალისტს პირადობის მოწმობა უკვე აღებული აქვს, ახლა კი საზღვარგარეთის პასპორტის აღების პროცედურა მიმდინარეობს.

მისი თქმით, აღნიშნული პროცესი წლების განშორების დასრულებისა და ოჯახის გაერთიანებისკენ გადადგმული ერთ-ერთი ყველაზე მნიშვნელოვანი ნაბიჯია, რომელიც აფგანის სრული უსაფრთხოების უზრუნველყოფასაც უკავშირდება.

მისივე ცნობით, დღეს აფგან სადიგოვის თავისუფლების 23-ე დღეა.

"ბიძინა ივანიშვილისა და აზერბაიჯანის რეჟიმის ერთობლივი პოლიტიკური გადაწყვეტილების ფარგლებში საქართველოდან აზერბაიჯანში დეპორტაციიდან 23 დღე უკვე გაატარა," — განაცხადა სევინჩ სადიგოვმა და დასძინა, რომ ის ეტაპობრივად გააგრძელებს პროცესის დეტალების გასაჯაროებას.