ჩრდილოეთ კორეის დედაქალაქში "საზღვარგარეთის სამხედრო ოპერაციების საბრძოლო გმირების მემორიალური მუზეუმის" საზეიმო გახსნა გაიმართა. ღონისძიება რუსეთის ფედერაციის კურსკის ოლქის ე.წ. "გათავისუფლების" ოპერაციის დასრულების პირველ წლისთავს მიეძღვნა.

ცერემონიას პირადად ესწრებოდა ქვეყნის ლიდერი კიმ ჩენ ინი, რომელმაც სიტყვით გამოსვლისას ხაზი გაუსვა ჩრდილოეთ კორეისა და რუსეთის "სისხლით ნათესავურ" კავშირს. მან მადლობა გადაუხადა ჯარისკაცებს, რომლებმაც "სამართლიანობისთვის ბრძოლაში რუს ამხანაგებთან ერთად ერთ სანგარში იბრძოლეს".

გახსნას რუსეთის სახელმწიფო დუმის თავმჯდომარე ვიაჩესლავ ვოლოდინი და თავდაცვის მინისტრი ანდრეი ბელოუსოვი ესწრებოდნენ. ვოლოდინმა დამსწრეებს ვლადიმერ პუტინის წერილი წაუკითხა, სადაც რუსეთის პრეზიდენტი მადლიერებას გამოხატავს კორეელი ჯარისკაცების მიმართ. კიმ ჩენ ინმა პირადად მიიღო მონაწილეობა დაღუპული ჯარისკაცების ნეშტების დაკრძალვის პროცესში.

მუზეუმში გამოფენილია საომარი მოქმედებების ამსახველი ფოტოები და "ალაფის სახით მოპოვებული" შეიარაღება.

კიმ ჩენ ინის განცხადებით, ეს მემორიალი ჩრდილოეთ კორეისა და რუსეთის ურღვევი ალიანსის სიმბოლო გახდება, რომელიც "დასავლურ ჰეგემონიასა და უსამართლობას" უპირისპირდება.