ევროპის საბჭოს საპარლამენტო ასამბლეაზე (PACE) სიტყვით გამოსვლისას, ადამიანის უფლებათა დაცვის კომისარმა, მაიკლ ო'ფლაერტმა საქართველოში შექმნილ მდგომარეობაზე ისაუბრა. ერთ-ერთი დეპუტატის კითხვა ეუთოს "მოსკოვის მექანიზმის" ანგარიშს ეხებოდა, რომელიც პოლიტიკური ნიშნით დაკავებული პირების, ჟურნალისტებისა და აქტივისტების დაუყოვნებლივ გათავისუფლებას მოითხოვს.

კომისარმა ხაზი გაუსვა, რომ საქართველო მისთვის პრიორიტეტული ქვეყანაა და აქ არსებულ პრობლემებს, მათ შორის პოლიციის სისასტიკესა და სამოქალაქო სექტორზე ზეწოლას, აქტიურად აკვირდება. ო'ფლაერტმა დაადასტურა, რომ მუდმივ კომუნიკაციაშია როგორც მედიის წარმომადგენლებთან, ისე პოლიტიკურ წრეებთან.

"საქართველოში ადამიანის უფლებების მხრივ არსებულ ვითარებას ნამდვილად ძალიან სერიოზულად ვუყურებ. ის იმ ქვეყანათა მცირე რიცხვშია, რომელსაც უკვე ორჯერ ვეწვიე მას შემდეგ, რაც ეს თანამდებობა დავიკავე. ასამბლეის ზოგიერთმა წევრმა შეიძლება უკვე იცოდეს, რომ ცოტა ხნის წინ დავბრუნდი [საქართველოდან]. გასულ კვირას ვიყავი იქ. გასულ კვირას პოლიციის სისასტიკის საკითხს განვიხილავდი, რომელსაც 2024 წლის პროტესტების დროს ჰქონდა ადგილი, 2024 წლის დასასრულს — 2025 წლის დასაწყისში, სამოქალაქო საზოგადოებაზე გაზრდილი ზეწოლისა და აფხაზეთსა და სამხრეთ ოსეთში ადამიანის უფლებების საკითხებს. გუშინ გავავრცელე განცხადება, რომელშიც ვისაუბრე ამ საკითხებზე. მომავალ კვირებში უფრო დეტალურ განცხადებას გავავრცელებ. კითხვა დასვით, შევხვდი თუ არა ხალხს — კი, რა თქმა უნდა. ბევრი შეხვედრები მქონდა სამოქალაქო საზოგადოებასთან და ჟურნალისტებთან ჩემი ვიზიტის დროს, და ჩემი ვიზიტის მიღმაც ვხვდები მათ, ისევე როგორც პოლიტიკოსებს, კონკრეტულად კი აქ, სტრასბურგში. გავაგრძელებ საკითხების ფართო სპექტრში ჩართულობას, მათ შორის იმათ გათავისუფლებაზეც, ვინც არ უნდა იყოს ციხეში", — განაცხადა ევროკომისარმა.