ოპოზიციური ალიანსი ქართული ენის დღესთან დაკავშირებით განცხადებას ავრცელებს და ამბობს, რომ გალის რაიონში მცხოვრები ეთნიკური ქართველების უფლებები კვლავ ირღვევა.

განცხადებაში აღნიშნულია, რომ გალში მცხოვრებ ქართველებს არ აქვთ შესაძლებლობა, განათლება მშობლიურ ენაზე მიიღონ როგორც სკოლებში, ისე საბავშვო ბაღებში.

"დღეს ქართული ენის, ჩვენი დედაენის დღეს, მნიშვნელოვანია გვახსოვდეს, რომ ქართული ენა კვლავ იდევნება", ხოლო კრემლი "მარიონეტული საოკუპაციო რეჟიმის გამოყენებით, გალში მცხოვრები ეთნიკურად ქართველი მოსახლეობის დათრგუნვას, მისთვის მშობლიურ განათლების შეზღუდვით, ხშირ შემთხვევაში სრული აკრძალვით ცდილობს", — ნათქვამია განცხადებაში.

ამასთან, ალიანსი აცხადებს, მკაცრად არის შეზღუდული ქართულენოვანი ლიტერატურის გავრცელება, რის გამოც მოზარდებს ფაქტობრივად არ შეუძლიათ მისაღები გამოცდებისთვის ქართულ ენაზე მომზადება.

ოპოზიციური ალიანსი პასუხისმგებლობას საქართველოს ხელისუფლებას აკისრებს.

"ივანიშვილის რეჟიმი არაფერს აკეთებს გალში მცხოვრები საქართველოს მოქალაქეების დასაცავად. მაგალითად, ახლა, როდესაც საქართველოს მოქალაქეებს ელექტროენერგია გაუძვირდათ, ირკვევა, რომ ენგურჰესის გამომუშავებული ელექტროენერგია მთლიანად საოკუპაციო რეჟიმთან მიდის თითქმის მთლიანად უსასყიდლოდ — მაშინ როცა ის მაინცაა შესაძლებელი, მიწოდების წინაპირობად ქართული ენის და ზოგადად, გალში მცხოვრები ეთნიკური ქართველების უფლებრივი მდგომარეობის გაუმჯობესება დადგეს".

მათივე შეფასებით, ხელისუფლების პოლიტიკა "კაპიტულანტურია“ და "რუსეთის ჰიბრიდული ომის იარაღს" წარმოადგენს, გამოსავლად კი ხელისუფლების ცვლილებას ასახელებენ.

"როგორი აღმაშფოთებელიც არ უნდა იყოს, რეჟიმის უმოქმედობა კანონზომიერი და ლოგიკურია იმიტომ, რომ ივანიშვილის რეჟიმი რუსეთის ჰიბრიდული ომის იარაღია და მოსკოვს ძალიან მკაფიოდ დასახული ბნელი მიზანი ამოძრავებს — კრემლის ამოცანა ქართული სახელმწიფოსთვის, ქართველი ხალხისთვის და ქართული ენისთვის ძირის გამოთხრაა — ამას ადასტურებს ის ფაქტიც, რომ რუსული რეჟიმის კაპიტულანტური პოლიტიკის შედეგად, გალში მცხოვრები ქართველების მდგომარეობა ოდნავადაც არ გაუმჯობესებულა!

საქართველოს სახელმწიფო დამოუკიდებლობა, ქართული ენა და იდენტობა რეალურად რომ დავიცვათ და ქართველი ხალხი რუსული ჩამორჩენილობისა და სიღატაკის ჭაობს გადაურჩეს, უნდა მოხდსს ივანიშვილის რუსული რეჟიმის მშვიდობიანი დემონტაჟი და ქვეყნის ხელისუფლებაში ეროვნული, დემოკრატიული ხელისუფლება უნდა მოვიდეს, რომლის მიზანიც საქართველოს მოქალაქეების სასიცოცხლო ინტერესების სამსახური იქნება", — წერია ოპოზიციური ალიანსის მიერ სოციალურ ქსელში გამოქვეყნებულ განცხადებაში.