"ჩვენ გვინდა ვნახოთ კონკრეტული ქმედებები. მზად ვართ ავაშენოთ ურთიერთობები ნებისმიერ ქვეყანასთან, თუ ისინი თანასწორი, ურთიერთსასარგებლო და ინტერესთა ბალანსზე დაფუძნებული იქნება", — განაცხადა რუსეთის საგარეო საქმეთა მინისტრმა, სერგეი ლავროვმა უნგრეთთან სამომავლო ურთიერთობებზე.

ლავროვს ასევე ჰკითხეს მადიარის საგარეო კურსთან დაკავშირებით. მისი თქმით, "ყველაფერი დამოკიდებულია იმაზე, თუ როგორ ესმის ამ მთავრობა თავის ეროვნულ ინტერესებს".

"არც კი მინდა კომენტარის გაკეთება იმაზე, რასაც ხალხი ამბობდა წინასაარჩევნო და არჩევნების შემდგომ პერიოდში.

ჩვენ მზად ვართ ავაშენოთ ურთიერთობები ახალ მთავრობასთან. ყველაფერი დამოკიდებულია იმაზე, თუ როგორ ესმის ამ მთავრობა თავის ეროვნულ ინტერესებს", — განაცხადა ლავროვმა.

უნგრეთის არჩევნებში გამარჯვებულმა პეტერ მადიარმა ორშაბათს განაცხადა, რომ ის რუსეთის პრეზიდენტ ვლადიმერ პუტინს დაელაპარაკება, მაგრამ თავად არ დაურეკავს.

"თუ ვლადიმერ პუტინი დარეკავს, ტელეფონს ავიღებ, მაგრამ მასთან კონტაქტის ინიციატორი არ ვიქნები", — განაცხადა მან არჩევნებში გამარჯვების შემდეგ გამართულ პირველ პრესკონფერენციაზე. "თუ ვისაუბრებთ, შემიძლია ვუთხრა, რომ კარგი იქნებოდა ოთხი წლის შემდეგ მკვლელობების და ომის დასრულება".

"ეს ალბათ მოკლე სატელეფონო საუბარი იქნებოდა და არა მგონია, რომ მან ჩემი რჩევით დაასრულოს ომი", — თქვა მადიარმა.

მან ისიც თქვა, რომ გადახედავს უნგრეთში რუსული ენერგიის შესახებ "ყველა კონტრაქტს", ხელახლა განიხილავს და "საჭიროების შემთხვევაში" შეწყვეტს.

მადიარი არჩევნებამდეც აცხადებდა, რომ რუსეთის პრეზიდენტ ვლადიმერ პუტინთან მოლაპარაკებებს არ გამორიცხავდა, თუ ამის საჭიროება იქნებოდა.

"ჩვენ რუსეთის პრეზიდენტთან მოლაპარაკებების მაგიდასთან მოგვიწევს დასხდომა. არც რუსეთის და არც უნგრეთის გეოგრაფიული პოზიციები არ შეიცვლება. ჩვენი ენერგოდამოკიდებულებაც გარკვეული დროის განმავლობაში შენარჩუნდება. დივერსიფიკაცია უნდა გაძლიერდეს, მაგრამ ეს მყისიერად არ მოხდება. საჭიროების შემთხვევაში, ჩვენ მოლაპარაკებებს ვაწარმოებთ, მაგრამ მეგობრები არ გავხდებით", — თქვა მადიარმა.

შეგახსენებთ, 12 აპრილს უნგრეთში საპარლამენტო არჩევნები გაიმართა, რომლის შედეგებითაც ოპოზიციონერი პეტერ მადიარის პარტიამ ვიქტორ ორბანის 16-წლიანი მმართველობა დაასრულა. მადიარის პარტია Tisza-მ ხმების 53%% მოიპოვა, რაც პარლამენტში 138 მანდატის მიღებას ნიშნავს. ვიქტორ ორბანის პარტია — Fidesz-მა კი 38% (55 მანდატი).