აშშ-ის ვიცეპრეზიდენტი ჯეი დი ვენსი მზადაა ჩაერთოს აშშ-ირანის მოლაპარაკებებში, თუ მიმდინარე კომუნიკაცია პირდაპირ, მაღალი დონის შეხვედრებში გადაიზრდება. ამის შესახებ ინფორმაციას POLITICO ავრცელებს.

ამჟამად მოლაპარაკებებს აშშ-ის პრეზიდენტის სპეციალური წარმომადგენელი სტივ ვიტკოფი და პრეზიდენტის სიძე ჯარედ კუშნერი უძღვებიან, თუმცა, POLITICO-ს პროცესში ჩახედული ანონიმური წყაროს ცნობით, თუ ისინი საკმარის პროგრესს მიაღწევენ, საქმეში შესაძლოა ვენსიც ჩაერთოს.

"პრეზიდენტ ტრამპს ჰყავს ეროვნული უსაფრთხოების არაჩვეულებრივი გუნდი, მათ შორის ვიცეპრეზიდენტი ვენსი, სახელმწიფო მდივანი მარკო რუბიო, სპეციალური წარმომადგენელი ვიტკოფი და ბატონი კუშნერი. ისინი ერთობლივად მუშაობენ იმის დასადგენად, არის თუ არა შესაძლებელი სამშვიდობო შეთანხმების მიღწევა...

ვიცეპრეზიდენტი ყოველთვის იყო სანდო ხმა საგარეო პოლიტიკის საკითხებში. პრეზიდენტი აფასებს მის მუშაობას იმის გასარკვევად, შეუძლიათ თუ არა ირანელებს თვალი გაუსწორონ არსებულ რეალობას. მანამდე კი, აშშ-ის სამხედრო ძალები განაგრძობენ ყველა სამხედრო სამიზნის განადგურებას და ირანი ხვალ ღამით "ქვის ხანაში" დაბრუნდება, თუ ისინი სერიოზულ მოლაპარაკებებში არ ჩაერთვებიან", — განაცხადა თეთრი სახლის სპიკერმა ანა კელიმ.

POLITICO წერს, რომ ვენსის შესაძლო ჩართულობა ორ ქვეყანას შორის მოლაპარაკებების საკმაოდ დელიკატურ მომენტს ემთხვევა. ტრამპი ირანს "ქვის ხანაში" დაბრუნებით ემუქრება, თუ მისი ლიდერები სამშაბათს ღამემდე მოთხოვნებს არ დათანხმდებიან. მიუხედავად იმისა, რომ ვენსის მონაწილეობა თეთრი სახლის მხრიდან გამოსავლის ძიების სერიოზულობაზე მიუთითებს, თავდაცვის მდივანი პიტ ჰეგსეთი მომდევნო დღეებში ქვეყანაზე უპრეცედენტო დარტყმების პირობას დებს.