ხალხის ძალის დეპუტატის, გურამ მაჭარაშვილის განცახდებით, "ელენე ხოშტარია არანაირი პოლიტიკური ოპონენტი არ არის, ის ჩვეულებრივი "ხულიგანია".

მაჭარაშვილის აზრით, ხოშტარიას "სურდა თავისი პატრონების დავალებით პოლიტპატიმრობის მანტია მოერგო" და დასძინა, რომ ხოშტარიას წინააღმდეგ სამართლებრივი დევნა პოლიტიკურად განსხვავებული პოზიციების გამო არ დაწყებულა.

"ელენე ხოშტარია არანაირი პოლიტიკური ოპონენტი არ არის, ის ჩვეულებრივი "ხულიგანია" — მას სურდა, ალბათ, თავისი პატრონების დავალებით, რომ პოლიტპატიმრობის მანტია მოერგო.

საბედნიეროდ, ქართული საზოგადოების აბსოლუტური უმრავლესობა უკვე ძალიან კარგად ხედავს ყველაფერს — ვინ არის გმირი, ვინ არის ანტიგმირი, ვის სურს საქართველოსთვის სიკეთე და ვის სურს ბოროტება. მათ, მათ შორის, ხოშტარიას, სურდათ, ვითომ, პოლიტპატიმრობის მანტია [მოერგოთ], როცა საპყრობილეში თავისი ნებით წავიდნენ. როდესაც გირაოს არ იხდი ე.ი. მიზანი გაქვს, მოხვდე საპყრობილეში. სხვა საკითხია, ეს არის უცხოეთიდან, თუ შენი ნებით. ალბათ, უფრო უცხოეთიდან იყო, უთხრეს, საპყრობილეში შედი და იქიდან ჩვენ პოლიტპატიმრობის მანტიას გამოგიგზავნით, რაც, რა თქმა უნდა, ვერ შედგებოდა. ვინ ვინ და ხოშტარია პოლიტიკურად განსხვავებული პოზიციებისთვის რომ არ არის.

საპყრობილეში, ყველამ კარგად იცის. მარტო ის რად ღირს, რომ თავად აღიარა, რომ საწყობებში ჰქონდა პიროტექნიკა, ბენზინი, ბოთლები, ყველაფერი, რითაც უნდა დაეწვათ პოლიციელები, შტურმი განეხორციელებინათ პარლამენტზე და ა.შ. თვითონ აღიარეს, მტკიცებულებებიც ბევრი აღარ არის მოსაპოვებელი. ასე რომ ის მანტია, ვითომ პოლიტპატიმრობის, რა თქმა უნდა, თავიდანვე იყო განწირული. ვინც დღეს იხდის სასჯელს, იხდის სწორედ სამართლებრივი ქმედებებიდან გამომდინარე," — განაცხადა მაჭარაშვილმა.

ცნობისთვის, ქართული ოცნების დეპუტატის, გია ვოლსკის განცხადებით, ელენე ხოშტარია "ფლომასტერით გაკეთებული წარწერის გამო არ ზის ციხეში" და ის სასჯელს "იმ სქემის განვითარებისთვის იხდის, რომელსაც რევოლუცია ჰქვია".

შეგახსენებთ, 24 მარტს, თბილისის საქალაქო სასამართლომ ოპოზიციური პარტია დროას ლიდერს, ელენე ხოშტარიას, 1,5 წლით თავისუფლების აღკვეთა მიუსაჯა საქართველოს სისხლის სამართლის კოდექსის 187-ე მუხლით, რაც გულისხმობს "სხვისი ქონების დაზიანებას ან განადგურებას, რამაც მნიშვნელოვანი ზიანი გამოიწვია". მან 2025 წლის 14 სექტემბერს მმართველი პარტიის, ქართული ოცნების წარმომადგენლის, თბილისის მოქმედი მერის საარჩევნო პლაკატებზე მარკერით დაწერა "რუსული ოცნება". პროკურატურის ცნობით, ზარალმა 570 ლარი (210 აშშ დოლარი) შეადგინა.

ელენე ხოშტარიამ განაცხადა, რომ ეს იყო სოლიდარობის აქტი აქტივისტ მეგი დიასამიძის მიმართ, რომელიც რამდენიმე დღით ადრე მსგავსი საპროტესტო აქტისთვის დააკავეს. მეგი დიასამიძე გირაოთი გაათავისუფლეს და მისი საქმე კვლავ განხილვის პროცესშია.