მედიის განვითარების ფონდის კვლევის მიხედვით, 10-მა პოლიტიკურმა სუბიექტმა სხვადასხვა მედიასაშუალებაში 105 ანტიდასავლური და დისკრიმინაციული კომენტარი გააჟღერა. კვლევა პირველი სექტემბრიდან 7 ოქტომბრის ჩათვლით პერიოდს მოიცავს და დღეს, 19 ოქტომბერს გამოქვეყნდა.

ფოტო: ფოტო MDF-ის კვლევიდან

მონიტორინგის პერიოდში პოლიტიკური პარტიებისა და მედიის წარმომადგენელთა 270 კომენტარიდან ნახევარზე მეტი (139) ანტიდასავლური შინაარსის იყო. შემდეგ ადგილზეა ქსენოფობია სხვადასხვა ჯგუფების მიმართ (47), რასაც თურქოფობიული (41), ჰომოფობიური (32), გენდერული სტერეოტიპების შემცველი (8), რასისტული (2) და რელიგიური ნიშნით დისკრიმინაციული (1) განცხადებები მოსდევს.

კვლევისთვის ორგანიზაცია შემდეგ მედიასაშუალებებს დააკვირდა:

  • 4 ტელევიზიის საინფორმაციო და ანალიტიკური გამოშვება: საზოგადოებრივი მაუწყებელი (მოამბე), რუსთავი 2 (კურიერი, P.S), მაესტრო (კონტაქტი) იმედი (ქრონიკა, იმედის კვირა);
  • 4 ტელევიზიის თოქ-შოუ: მაესტრო (ცეცხლის ხაზი), იბერია (ცენზურის გარეშე), კავკასია (ბარიერი სპექტრი), ობიექტივი (ღამის სტუდია, ოქროს კვეთა);
  • 2 ტელევიზიის სპეციალური წინასაარჩევნო გადაცემა: იმედი (ამომრჩევლის პირისპირ), საზოგადოებრივი მაუწყებელი (თვითმმართველობა 2017);
  • 5 ონლაინ გამოცემა: საქინფორმი, ნეტგაზეთი, საქართველო და მსოფლიო, PIA, IPN;
  • 4 გაზეთი: რეზონანსი, ასავალ-დასავალი, ალია, პრაიმ-ტაიმი;
  • გარდა მონიტორინგის რეგულარული სუბიექტებისა, შემთხვევითი შერჩევის პრინციპით ანგარიშში მოხვდა პოლიტიკოსთა დისკრიმინაციული განცხადება სხვა მედია საშუალებებიდან.