ლაბუბუს უზომოდ პოპულარული თოჯინები მალე საკუთარ სრულმეტრაჟიან ფილმში გამოჩნდებიან, ამის შესახებ ჩინურმა სათამაშოების კომპანია Pop Mart-მა და Sony Pictures-მა განაცხადეს.

კომპანიების განცხადებით, ფილმი, რომელიც მხატვრული კინოსა და კომპიუტერული ანიმაციის ნაზავი იქნება, "განვითარების ადრეულ ეტაპზეა". მას პოლ კინგი გადაიღებს, რომლის ანგარიშზეც ისეთი პროექტებია, როგორიცაა ვონკა, პადინგტონი და BBC-ის კომედიური სერიალი The Mighty Boosh. პრემიერის თარიღი ჯერჯერობით უცნობია.

გლობალური ფენომენი

ბოლო წლებში ლაბუბუმ მსოფლიო აღიარება მოიპოვა. მათმა გაყიდვებმა Pop Mart სათამაშოების ინდუსტრიის გიგანტად აქცია, რომლის ღირებულებაც თითქმის 40 მილიარდ დოლარს აღწევს. ამ მაჩვენებლით მან ისეთ დამკვიდრებულ კონკურენტებსაც კი გადაასწრო, როგორიცაა ბარბის მწარმოებელი Mattel.

ლაბუბუს გარშემო ატეხილმა აჟიოტაჟმა Pop Mart-ს საშუალება მისცა, გასცდენოდა მხოლოდ სათამაშოების წარმოებას, კომპანიამ პეკინში გასართობი პარკი გახსნა, ახლა კი კინოინდუსტრიაშიც შეაბიჯა.

რა არის ლაბუბუ და რატომაა ასეთი პოპულარული?

რა ხდის ლაბუბუს განსაკუთრებულს?

ლაბუბუ კომპანიის ყველაზე პოპულარული პერსონაჟია. მისი მიმზიდველობის ერთ-ერთი მიზეზი ე.წ. "ბრმა ყუთებია" (blind boxes), მყიდველმა არ იცის, კონკრეტულად რომელი ლაბუბუ შეხვდება მანამ, სანამ შეფუთვას არ გახსნის.

პერსონაჟების პოპულარობას ხელი ცნობილმა ადამიანებმაც შეუწყვეს: მაგალითად, რიანასა და Blackpink-ის წევრ ლისას არაერთხელ დაუფიქსირებიათ ლაბუბუს აქსესუარები თავიანთ ძვირადღირებულ ჩანთებზე.

პერსონაჟი ათ წელზე მეტი ხნის წინ ჰონგ-კონგელმა ხელოვანმა, კასინგ ლუნგმა შექმნა. ლაბუბუ არის ტყის ელფი, რომელიც სკანდინავიური მითოლოგიითაა შთაგონებული. ის ლუნგის წიგნების სერიის, The Monsters-ის ნაწილია. კასინგ ლუნგი ფილმის აღმასრულებელი პროდიუსერი იქნება. რეჟისორ პოლ კინგთან ერთად სცენარზე იმუშავებს სტივენ ლევენსონი, რომელიც ცნობილია მიუზიკლებით Dear Evan Hansen და Tick, Tick... Boom!

ექსპერტების აზრით, მედია-ფრენჩაიზის გაშვება სათამაშოების პოპულარობის შემდეგ ლოგიკური ნაბიჯია. სინგაპურის ეროვნული უნივერსიტეტის მარკეტინგის ლექტორის, კიმ და-იუნგის თქმით, ეს დაეხმარება Pop Mart-ს, გარდაიქმნას სათამაშოების რითეილერიდან გასართობ ბრენდად.

"Gen Z და მილენიალი მომხმარებლებისთვის კონტენტი და კომერცია მჭიდროდ არის გადაჯაჭვული. ისტორიის ნახვა, პერსონაჟთან ემოციური კავშირის დამყარება და შემდეგ მისი სამყაროს ნაწილის შეძენა ერთიანი პროცესია... პოტენციალი ძალიან დიდია," — განუცხადა კიმმა BBC-ს.

სინგაპურის მენეჯმენტის უნივერსიტეტის პროფესორი კაპილ ტული კი მიიჩნევს, რომ ლაბუბუ-ს ერთგული და ფანატიკური მომხმარებელთა ბაზა ფილმის წარმატების გარანტიაა. მისივე თქმით, პროექტი კარგად გამოიყენებს ჩინური ანიმაციის ამჟამინდელ აღმავლობას: "ამ ნახტომის გასაკეთებლად ახლა საუკეთესო მომენტია".

ასევე ნახეთ: