თუ ამ სტატიას კითხულობ, დიდი ალბათობით სადღაც უკვე გინახავს ლაბუბუ — ტიკტოკზე, მეგობრების ჩატში, ან შენი შვილის სურვილების სიაში— და ახლა გაინტერესებს, საერთოდ, რა არის ეს უშნო მონსტრი და რატომაა ასეთი პოპულარული?

პირველ რიგში უნდა იცოდე, რომ ლაბუბუ გოგოა! მართალია, ბევრი ფიქრობს, რომ თოჯინა ბიჭია, მაგრამ მისი ფანები ამ შეცდომას სწრაფად შეგისწორებენ. ლაბუბუ ცალკე პერსონაჟი არაა — ის ეკუთვნის სათამაშოთა დიდ ჯგუფს, რომელსაც "მონსტრები" ჰქვია. თოჯინების ეს სერია ჰონგ-კონგელმა ხელოვანმა და ავტორმა, კასინგ ლუნგმა შექმნა. "მონსტრები" პირველად 2015 წელს გამოჩნდნენ სკანდინავიური მითოლოგიით შთაგონებულ, დასურათებულ წიგნებში და 2019 წლისთვის სათამაშოების გიგანტმა Pop Mart-მა ისინი ვირუსულად გავრცელებულ შესაგროვებელ ფიგურებად აქცია.

ფოტო: Pop Mart

ლაბუბუ აღწერილია, როგორც "ელფის მსგავსი არსება" და Pop Mart-ის თქმით, "მიუხედავად ეშმაკური გარეგნობისა, მას კეთილი გული აქვს და ყოველთვის ცდილობს დაეხმაროს სხვებს, თუმცა ხშირად საპირისპირო გამოსდის." ის შეიძლება პატარა და საშიში ჩანდეს, მაგრამ კეთილი ზრახვები აქვს.

რატომ გახდა ლაბუბუ ასეთი პოპულარული?

ფოტო: Lisa/ IG

ლაბუბუს პოპულარობა დიდწილად უკავშირდება BLACKPINK-ის წევრს, ლისას, რომელმაც ლაბუბუზე სიყვარულით არაერთხელ ისაუბრა ინტერვიუებსა და სოციალურ ქსელებში. ამის შემდეგ "უშნო" თოჯინაზე მოთხოვნა საგრძნობლად გაიზარდა — ფანები ღამეებსაც კი ათენებენ მაღაზიის რიგში, როცა ლაბუბუს ფიგურების რაოდენობა ივსება და სხვადასხვა საიტებზე მაღაზიის ფასზე ბევრად მეტსაც კი იხდიან ამ უცნაურ თოჯინებში.

აღსანიშნავია, რომ ლაბუბუს არამხოლოდ ბავშვები, არამედ ზრდასრულებიც აქტიურად ყიდულობენ და მას აქსესუარად იყენებენ — ერთ-ერთი ყველაზე პოპულარული გზა ლაბუბუს გამოსაყენებლად ჩანთების მისით გაფორმებაა.

ფოტო: InStyle

დღესდღეობით, "მონსტრების" სერია Pop Mart-ის ყველაზე გაყიდვადი ფრენჩაიზია და NBC News-ის ინფორმაციის თანახმად, წინა წელს მისმა გაყიდვებმა კომპანიას $419 მილიონი მოუტანა.