რუსეთის საგარეო საქმეთა სამინისტროს პრესსპიკერმა, მარია ზახაროვამ ბრიფინგზე განაცხადა, რომ სულ უფრო მეტი ქართველი პოლიტიკოსი უჭერს მხარს მოსკოვთან ურთიერთობების აღდგენას, ბურთი რუსეთის მოედანზე არ არის, თუმცა "მზად არიან კარგი, საინტერესო, მიმზიდველი და ამავდროულად სპორტული თამაშისთვის".

"როგორც ვხედავთ და აღვნიშნავთ, სულ უფრო მეტი საქართველოს მოქალაქე და პოლიტიკოსი იწყებს რუსეთთან ურთიერთობების აღდგენის მხარდაჭერას. ამ ურთიერთობებმა კოლოსალური დარტყმა განიცადა მათგან, ვინც მანიპულირება მოახდინა კავკასიაში არსებული სიტუაციით, როგორც მთლიანად სამხრეთ კავკასიაში, ასევე რუსეთის ფედერაციის ჩრდილოეთ კავკასიაში, ვინც მანიპულირება მოახდინა პოსტსაბჭოთა სივრცეზე, რომელთა მიზანი იყო ქაოსის დათესვა ამ ოდესღაც საერთო სივრცეში. მათ ეს გააკეთეს ისტორიული კავშირების გაუთვალისწინებლად, გააკეთეს ეს ისტორიული კავშირების და იმ კავშირების საწინააღმდეგოდ, რომლებიც გვაკავშირებდა. ისინი უხეშად, ცინიკურად მოქმედებდნენ და არა მხოლოდ კონფლიქტებს, არამედ რეალურ შეტაკებებს იწვევდნენ", — თქვა ზახაროვამ.

მისი თქმით, ეს პროვოკაციები ნაწილობრივ წარმატებული იყო.

"მაგრამ მე ვფიქრობ, რომ მათ ბევრად მეტი სურდათ და მეტს ვერ მიაღწიეს. მაგრამ ამავდროულად, ურთიერთობები მართლაც გაწყდა. ამასობაში, ბოლო წლებში, როგორც ეკონომიკური, ასევე ჰუმანიტარული კავშირების აღდგენა დაიწყო", — ამბობს ზახაროვა და ამატებს. რომ "ამჟამინდელი ხელისუფლება აცხადებს, რომ აპირებს, იხელმძღვანელოს ქართველი ხალხის ნებით. რა თქმა უნდა, ჩვენ გვსურს ამ მიმართულებით პრაქტიკული ნაბიჯების ნახვა. თუმცა, მინდა ხაზგასმით აღვნიშნო, რომ ამ საკითხში ბურთი ჩვენს მოედანზე არ არის. თუმცა, ჩვენ მზად ვართ კარგი, საინტერესო, მიმზიდველი და ამავდროულად სპორტული თამაშისთვის".