ოცნების პრემიერი ირაკლი კობახიძე იმეორეს ოცნების პარლამენტის ვიცესპიკერის, თეა წულუკიანი ნარატივს იმის შესახებ, რომ გიორგი ანწუხელიძე სააკაშვილის ავანტიურას შეეწირა. მან ამის შესახებ ჟურნალისტებთან საუბრისას თქვა. კობახიძემ დააზუსტა, რომ "ომი სააკაშვილის რეჟიმმა დაიწყო, მაგრამ გიორგი ანწუხელიძე შეეწირა რუსულ ოკუპაციას".

"თქვენ იცით იყო ოკუპაცია, რომელიც განხორციელდა საბჭოთა რეჟიმის მხრიდან და რა თქმა უნდა, ამ ოკუპაციას შეეწირა მარო მაყაშვილი. რა თქმა უნდა, ეს იყო საბჭოთა არმია და არსებითად ეს იყო, ბუნებრივია, რუსული. ასე ვთქვათ, წამყვანი ძალა იყო. საბჭოთა ძალა იყო და რუსები იყვნენ ძირითადად წარმოდგენილი, ბუნებრივია, საოკუპაციო ძალაში.

...1921 წელს მე მეეჭვება, რომ შესაძლებელი იყო [ოკუპაციის თავიდან არიდება], თუმცა თქვენ თუ სხვა მიმართულებით მიგყავთ, 2008 წელს სააკაშვილს შეეძლო არ დაეწყო. შედარებისთვის არ გამოგადგებათ. ...თეა წულუკიანმა სხვა რამე თქვა. საბოლოო ჯამში, გიორგი ანწუხელიძე, ისევე როგორც სხვა გმირები, 2008 წელს შეეწირნენ მიხეილ სააკაშვილის და მისი სისხლიანი რეჟიმის ავანტიურას. ეს თქვა თეა წულუკიანმაც. ...სააკაშვილმა თვითონ დაიწყო ომი, არიდება რა შუაშია? ომი სააკაშვილის რეჟიმმა დაწყო, მაგრამ, რა თქმა უნდა, გიორგი ანწუხელიძე შეეწირა რუსულ ოკუპაციას. ერთი მეორეს არ გამორიცხავს. ...90-იანი წლების დასაწყისში უამრავი შეცდომა იქნა დაშვებული. შესაძლებელი იყო პროცესების სხვა მიმართულებით განვითარება, თუმცა მძიმედ დამთავრდა [პროცესები]". ვერ აირიდა კი არა თვითონ [სააკაშვილმა] დაიწყო, და ამას მოჰყვა რუსული ოკუპაცია, — განაცხადა "ოცნების" პრემიერმა, ირაკლი კობახიძემ ჟურნალისტებთან საუბრისას.

ცნობისათვის, გასული წლის აპრილში საზოგადოებრივი მაუწყებლის ეთერში ნაციონალური მოძრაობის საქმიანობის შემსწავლელი დროებითი საგამოძიებო კომისიის თავმჯდომარემ და ქართული ოცნების პარლამენტის ვიცე-სპიკერმა, თეა წულუკიანმა განაცხადა, რომ 2008 წლის ომში დაღუპული გიორგი ანწუხელიძე მიხეილ სააკაშვილის პიარისთვის "უაზროდ გაიწირა".

"მარტივ ენაზე რომ ვთქვა, რატომ არ არის დღეს გიორგი ანწუხელიძე სახლში? მე მაქვს ჩემს თანამებრძოლებთან ერთად უფლება დავსვა ეს კითხვა. ვინ ამიკრძალოს ამ კითხვის დასმას, ვერავინ. ამ კითხვას ვსვამთ — ყველა ბავშვს სჭირდება თავისი მშობელი სახლში და არა უაზროდ განწირული ვიღაცის პიარისთვის. ამ შემთხვევაში სააკაშვილს ვგულისხმობთ," — განაცხადა თეა წულუკიანმა.