სოციალურ მედიაში ფართოდ გავრცელდა 2-წლამდე მინი პუდელის ისტორია, როცა ლას-ვეგასის მეტროპოლიტენის პოლიციის დეპარტამენტმა (LVMPD) 18 თებერვლის განცხადებაში დეტალურად აღწერა, როგორ მიატოვა მეპატრონემ ის და ინციდენტის ამსახველი ვიდეომასალაც გამოაქვეყნა.

მეპატრონემ, რომლის ვინაობაც ანონიმურად რჩება, ცუგა 2 თებერვლის გვიან საღამოს, ნევადის საერთაშორისო აეროპორტში, ავიაკომპანია JetBlue-ის ბილეთების სალაროსთან, ბარგის ზომის შესამოწმებელ მოწყობილობაზე მიაბა. პოლიცია ადგილზე მივიდა დაახლოებით 23:39 საათზე.

პოლიციის ინფორმაციით, "ავიაკომპანიის თანამშრომლებმა მეპატრონეს აცნობეს, რომ ძაღლის სერვის-ცხოველად გადაყვანისთვის აუცილებელი იყო ონლაინ დოკუმენტაციის შევსება", ხოლო "რადგან საჭირო საბუთები არ იყო მომზადებული, მგზავრს არ მიეცა ბორტზე ასვლის ნებართვა".

"ამის შემდეგ მან ძაღლი დატოვა და თვითონ გეითისკენ წავიდა", — აცხადებენ LVMPD-ში.

მოგვიანებით პოლიციელებმა მეპატრონე აეროპორტის ერთ-ერთ გეითთან იპოვეს და ძაღლის მიტოვების შესახებ დაუსვეს კითხვები, ეს ყველაფერი კამერის ჩანაწერშიც ჩანს.

"ჩანთებს დავაგდებ, ძალიან დავიღალე", — ამბობს ქალი სამხრე კამერის ჩანაწერში. პოლიციელი პასუხობს: "არა, ახლა ასე მოვიქცევით: უკან დაგაბრუნებთ ბილეთების სალაროსთან, სადაც თქვენი ძაღლი დატოვეთ და სამართალდარღვევის ოქმს დაგიწერთ".

კითხვაზე, რატომ დატოვა ძაღლი, მეპატრონემ პოლიციას განუცხადა, რომ JetBlue-მ შინაურ ცხოველთან ერთად ფრენის უფლება არ მისცა. მან ასევე თქვა, რომ ძაღლს ჩიპი ჰქონდა, რაც, პოლიციის განცხადებით "თითქოს მიანიშნებდა, რომ მისი დატოვება მისაღები იყო და ცხოველს მოგვიანებით დაუბრუნებდნენ", — აღნიშნავს პოლიცია. მოგვიანებით ქალი აგრესიულიც გახდა.

LVMPD-ის ინფორმაციით, მეპატრონე ცხოველის მიტოვებისა და დაკავებისთვის წინააღმდეგობის გაწევის ბრალდებით დააკავეს.

ამ დროს ცუგა, რომელსაც მოგვიანებით JetBlue დაარქვეს, ცხოველთა დაცვის სამსახურის მზრუნველობაში გადავიდა და რადგან 10 დღის განმავლობაში მეპატრონისგან არანაირი კონტაქტი არ შედგა, ლას-ვეგასის ადგილობრივ ორგანიზაციას, Retriever Rescue of Las Vegas-ს გადაეცა.

მისი ისტორიის ვირუსულად გავრცელების შემდეგ, JetBlue-მ "სიყვარულის უზარმაზარი ტალღა" მიიღო, წერს სამაშველო ორგანიზაცია Facebook-ზე — "ეს ტკბილი ბიჭი საოცარია. ნამდვილად საოცარი, და იმის გათვალისწინებით, რაც გადაიტანა, არ გვინდა, რომ ოდესმე ისევ იგრძნოს მიტოვება. ამიტომ ძალიან ყურადღებით შევარჩევთ მის მუდმივ ოჯახს. მას სჭირდება სტაბილურობა, უსაფრთხოება და ერთგულება, მთელი ცხოვრების განმავლობაში".

ორგანიზაციამ ლეკვის აყვანის 2400-ზე მეტი განაცხადი მიიღო, თუმცა საბოლოოდ JetBlue იმ პოლიციელთან წავა, ვინც აეროპორტში გამოძახებაზე მივიდა. აღმოჩნდა, რომ ოფიცერი ბლექი და მისი ოჯახი ჯერ კიდევ გასული წლის სექტემბრიდან ცდილობდნენ ამავე ორგანიზაციის დახმარებით მინი პუდელის აყვანას და რადგან მათ რამდენიმე თვის წინ უკვე ჰქონდათ გავლილი ყველა საჭირო პროცესი, JetBlue-სთვის იდეალურ მუდმივ ოჯახად სწორედ ისინი შეარჩიეს.

ამავე დროს, ორგანიზაცია Retriever Rescue of Las Vegas მოუწოდებს ყველას, ვინც JetBlue-ს აყვანის სურვილი გამოთქვა და განაცხადი გამოგზავნა მსოფლიოს სხვადასხვა ქვეყნიდან, მათ შორის ლონდონიდან, ვირჯინიის კუნძულებიდან და სხვ. მუდმივი საცხოვრებელი მისცენ სხვა ცუგებს, ორგანიზაციას ამჟამად კიდევ 40 ცუგა ჰყავს თავშესაფარში.

"JetBlue მხოლოდ ერთია", — ამბობენ ისინი, — "მაგრამ ოჯახი კიდევ ძალიან ბევრს სჭირდება".