ოცნების ხელისუფლების მთავრობამ შრომით იმიგრანტებსა და თვითდასაქმებულ უცხოელებზე შრომითი საქმიანობის უფლების გაცემის წესი დაამტკიცა.

დადგენილება, რომელიც "შრომითი მიგრაციის შესახებ" კანონს ეფუძნება და ხელს ოცნების პრემიერი ირაკლი კობახიძე აწერს, 2026 წლის 1 მარტიდან შევა ძალაში.

ახალი რეგულაციის მიხედვით, უცხოელებს, რომლებსაც არ აქვთ მუდმივი ბინადრობის ნებართვა, ადგილობრივ დამსაქმებელთან მუშაობა (მათ შორის დისტანციურად) ან თვითდასაქმება შეეზღუდებათ და ეკრძალებათ დასაქმება ისეთ პოზიციებზე, როგორიცაა — საკურიერო მომსახურება, მგზავრთა გადაყვანა, ტურისტებისთვის გიდების და სამთო, ალპური და სათხილამურო გამყოლების სერვისის მიწოდება.

დადგენილების მიხედვით, საქართველოში მუდმივი ბინადრობის ნებართვის არმქონე უცხოელებისთვის წლიური კვოტები წესდება შემდეგ პროფესიებსა და შრომით/სამეწარმეო საქმიანობებზე და განისაზღვრება კვოტები:

ა) შრომით/სამეწარმეო საქმიანობაზე, რომელიც უკავშირდება საკურიერო მომსახურებას, წლიური კვოტაა – 0;

ბ) შრომით/სამეწარმეო საქმიანობაზე, რომელიც დაკავშირებულია მგზავრების გადაყვანასთან, წლიური კვოტაა – 0;

გ) შრომით/სამეწარმეო საქმიანობაზე, რომელიც დაკავშირებულია ტურისტებისთვის გიდების სერვისის მიწოდებასთან, წლიური კვოტაა – 0;

დ) შრომით/სამეწარმეო საქმიანობაზე, რომელიც დაკავშირებულია ტურისტებისთვის სამთო, ალპური და სათხილამურო გამყოლების სერვისის მიწოდებასთან, წლიური კვოტა – 200.

შრომითი საქმიანობის უფლებას დასაქმების ხელშეწყობის სახელმწიფო სააგენტო გასცემს.

დადგენილების მიხედვით, დამსაქმებელი ვალდებულია, უცხოელის აყვანამდე მინიმუმ 10 სამუშაო დღით ადრე ვაკანსია worknet.moh.gov.ge-ზე განათავსოს. თუ სააგენტო 10 დღეში ვერ იპოვის შესაბამის ადგილობრივ კადრს, მხოლოდ ამის შემდეგ შეუძლია დამსაქმებელს მიმართოს სააგენტოს უცხოელზე უფლების მისაღებად.

ამას გარდა, რეგულაციები არ ვრცელდება: ლტოლვილის ან ჰუმანიტარული სტატუსის მქონე პირებზე; თავშესაფრის მაძიებლებზე; დიპლომატებსა და საერთაშორისო ორგანიზაციების თანამშრომლებზე; აკრედიტებულ უცხოელ ჟურნალისტებზე; საინვესტიციო ბინადრობის ნებართვის მქონე პირებზე.

როგორც ოცნების ხელისუფლების შს მინისტრის მოადგილემ, ალექსანდრე დარახველიძემ პროსამთავრობო ტელეკომპანია "იმედის" ეთერში განაცხადა, "ამ ნებართვის გაცემის პროცესი და ადმინისტრირება სახელმწიფოს მკაცრად ექნება გაწერილი".

"ნებართვების გაცემა მოხდება მხოლოდ იმ სფეროებში, სადაც კვალიფიციური და გარეშე კადრების დასაქმების კრიტიკული აუცილებლობა არსებობს. ხოლო იქ, სადაც ჩვენი მოქალაქეების მხრიდან მოთხოვნა არის ჭარბი, მაქსიმალურად შეიზღუდება და შეიძლება მინიმუმამდეც დავიდეს უცხოელების დასაქმება", — განაცხადა დარახველიძემ.