მწერალმა არუნდატი როიმ ბერლინალეს დატოვების გადაწყვეტილება მიიღო მას შემდეგ, რაც ფესტივალის ჟიურის პრეზიდენტმა, ვიმ ვენდერსმა თქვა, რომ რეჟისორებმა და კინოს შემქმნელებმა პოლიტიკისგან თავი შორს უნდა დაიჭირონ.

ფესტივალი ხუთშაბათს დაძაბული გარემოთი გაიხსნა: საკონკურსო ჟიურის, რომელსაც გერმანელი რეჟისორი ვიმ ვენდერსი ხელმძღვანელობს, ღაზაში მიმდინარე კონფლიქტზე ჰკითხეს. კითხვაზე, შეუძლია თუ არა კინოს პოლიტიკურ ცვლილებაზე გავლენის მოხდენა, ვენდერსმა უპასუხა, რომ "ფილმებს შეუძლიათ სამყაროს შეცვლა", თუმცა "არა პოლიტიკური გზით".

მისი თქმით, რეჟისორებმა "პოლიტიკისგან თავი შორს უნდა დაიჭირონ, რადგან თუ ჩვენ ვქმნით ფილმებს, რომლებიც გამიზნულად პოლიტიკურია, მაშინ პოლიტიკის სფეროში შევდივართ. ჩვენ კი პოლიტიკის საპირწონე ვართ, პოლიტიკის საპირისპირო. ჩვენ უნდა ვაკეთოთ ადამიანების საქმე და არა პოლიტიკოსების".

პარასკევს გავრცელებულ განცხადებაში, სადაც ფესტივალის დატოვება დააანონსა, როიმ ვენდერსის კომენტარებს "უსინდისო განცხადება" უწოდა, რომელიც "მსოფლიოში მილიონობით ადამიანმა მოისმინა".

ბუკერის პრემიის მფლობელმა ინდოელმა ავტორმა თქვა: "იმის მოსმენაზე, რომ ხელოვნება პოლიტიკური არ უნდა იყოს, ყბა ჩამომივარდა. ეს არის გზა, რომ დაიხუროს საუბარი კაცობრიობის წინააღმდეგ განხორციელებულ დანაშაულზე მაშინ, როცა ის ჩვენ თვალწინ რეალურ დროში მიმდინარეობს, მაშინ, როცა ხელოვანებმა, მწერლებმა და რეჟისორებმა ყველაფერი უნდა გააკეთონ, რაც შეუძლიათ, რათა ეს შეაჩერონ".

მან დაამატა: "მიუხედავად იმისა, რომ ღრმად მაწუხებს გერმანიის მთავრობისა და სხვადასხვა კულტურული ინსტიტუციის პოზიციები პალესტინის საკითხზე, გერმანელ აუდიტორიასთან ამ თემაზე საუბრისას ყოველთვის პოლიტიკურ სოლიდარობას ვგრძნობდი".

ვენდერსი წელს ბერლინალეს ჟიურის პრეზიდენტია. ჟიურის შემადგენლობაში ასევე შედიან ამერიკელი რეჟისორი და პროდიუსერი რეინალდო მარკუს გრინი, იაპონელი კინემატოგრაფისტი ჰიკარი, ნეპალელი რეჟისორი მინ ბაჰადურ ბჰამი, სამხრეთკორეელი მსახიობი ბე დუნა, ინდოელი რეჟისორი და პროდიუსერი შივენდრა სინგ დუნგარპური და ოსკარის მფლობელი ფილმის The Zone of Interest პროდიუსერი ევა პუშჩინსკა.

ჟიურის ასევე ჰკითხეს გერმანიის მთავრობის პოზიციაზე, რომელიც ფესტივალის ერთ-ერთი მთავარი დამფინანსებელია და რომელიც ისრაელს უჭერს მხარს. პუშჩინსკამ ეს კითხვა "რთულად" და "ცოტა უსამართლოდ" შეაფასა.

მისი თქმით, "რა თქმა უნდა, ჩვენ ვცდილობთ მაყურებელთან საუბარს და მათ დაფიქრებას, მაგრამ ვერ ვიქნებით პასუხისმგებლები იმაზე, თუ რას გადაწყვეტენ, ისრაელს დაუჭერენ მხარს თუ პალესტინას. არსებობს მრავალი სხვა ომი, სადაც გენოციდი ხდება და ჩვენ ამაზე არ ვსაუბრობთ".

როიმ ასევე გაუსვა ხაზი თავის პოზიციას, რომ "რაც უკვე მოხდა ღაზაში და რაც გრძელდება, არის პალესტინელი ხალხის გენოციდი ისრაელის სახელმწიფოს მიერ".

მისი თქმით, ეს ომი "დაფინანსებულია და მხარდაჭერილია აშშ-ისა და გერმანიის მთავრობების, ისევე როგორც ევროპის სხვა რამდენიმე ქვეყნის მიერ, რაც მათ ამ დანაშაულში თანამონაწილეებად აქცევს".

"თუ ჩვენი დროის ყველაზე დიდი კინემატოგრაფისტები და ხელოვანები ვერ დადგებიან და ვერ იტყვიან ამას, მათ უნდა იცოდნენ, რომ ისტორია მათ განსჯის. შოკირებული და აღშფოთებული ვარ", — თქვა როიმ.

"წვრილმანების ღმერთის" ავტორი ბერლინალეზე თავისი აღდგენილი 1989 წლის ფილმის In Which Annie Gives It Those Ones ჩვენებას უნდა დასწრებოდა.