12 თებერვალს, პაატა ბურჭულაძეს დაბადების დღეა. ოპერის მომღერალს რუსთავის მე-12 დაწესებულებაში 71 წლის იუბილე შეუსრულდა. დღეს, ბურჭულაძემ 4 ოქტომბრის საქმეზე გამართულ პროცესზე სიტყვით ისარგებლა:

"ჩემს ცხოვრებაში ყველა დაბადების დღე განსაკუთრებულია. შარშან ოპერის თეატრი არ დაგვითმეს და ოპერის წინ საბარგო მანქანაზე მივიღე მრავალათასიანი მილოცვა და კონცერტი; ეს იყო უბედნიერესი დღე ჩემს ცხოვრებაში. წელს, აქ ვღებულობ მილოცვებს, რაც ასევე დაუვიწყარი იქნება.

როგორც წესი, ამ დღეს არის უამრავი მოლოცვა და საჩუქარი, მთელი მსოფლიოდან. დღეს კი ამ ორი პროკურორის გადაწყვეტილებით ჩემს მეუღლესთან, შვილებთან და შვილიშვილებთან სატელეფონო საუბარიც მეკრძალება — აღარაფერს ვამბობ სხვა დანარჩენზე.

ჩვენი სარწმუნოება გვასწავლის, რომ ბოროტებას სიკეთით უნდა ვუპასუხოთ და მეც, როგორც ქრისტიანმა, გადავწყვიტე, რომ თქვენ, ბატონო ვაჟა თოდუა და განსაკუთრებით, თქვენ, ქალბატონო თამარ ბეჟუაშვილო — რომელიც ძალიან გამოირჩევით ამ უსამართლო ბრძოლაში, მინდა საჩუქარი გაგიკეთოთ და სიკეთით გიპასუხოთ.

მე შემიძლია წერილი მივწერო ევროპარლამენტს, ევროსაბჭოს, ევროკომისიას, რომ შემთხვევით არ გამორჩეთ თქვენ და თქვენი ოჯახის წევრები, იმ დასანქცირებულთა სიაში, რომელიც მომდევნო თვეებში გამოქვეყნდება — მერწმუნეთ ამ წერილს ანგარიშს გაუწევენ; მაგრამ მე ამას არ გავაკეთებ არა იმიტომ, რომ თქვენ ამას არ იმსახურებთ, არამედ იმიტომ რომ ჩვენ გვაქვს მაგალითები, რომ ოცნების წარმომადგენლებს, გამორჩეულად უარყოფით ადამიანებსაც კი, ჰყავთ შესანიშნავი შვილები და ვფიქრობ მათი მომავალი მშობლების საქციელს არ უნდა გადაჰყვეს, ისინი ჩვენი ქვეყნის შვილები არიან," — განაცხადა ბურჭულაძემ. (წყარო "პუბლიკა")

პაატა ბურჭულაძემ სასამართლო სიტყვაში იმ პოლიტიკოსებზეც ისაუბრა, რომლებიც რუსთავის მე-12 დაწესებულებაში მასთან ერთად სასჯელს იხდიან. მისი თქმით, ის ვისაც სჯერა, რომ ბურჭულაძე საშიშია საზოგადოებისთვის "სწრაფ გამოჯანმრთელებას უსურვებს"

"რუსთავის მე-12 პენიტენციურ დაწესებულებაში, პოლიტიკოსებს და კორუფციონერებს შორის მე ვარ ერთადერთი სახელოვნებო სფეროს წარმომადგენელი და გამოვირჩევი იმით, რომ ყველაზე საშიში დამნაშავის ბრალი მაქვს წაყენებული. გულწრფელად გეკითხებით, თქვენ თვითონ გჯერათ, რომ საქართველოსთვის და მისი სახელმწიფოებრიობისთვის პაატა ბურჭულაძე რაიმე საფრთხეს წარმოადგენს? ვისაც გჯერათ, სწრაფ გამოჯანმრთელებას გისურვებთ.

ახლა კი უნდა დაგემშვიდობოთ, ბევრი ადამიანი მელოდება ციხეში და მის გარეთ, ტელევიზიით, მილოცვისთვის," — თქვა ბურჭულაძემ.

ცნობისთვის, მთავრობის ყოფილი მაღალჩინოსნებიდან, ამ დროისთვის, რუსთავის მე-12 დაწესებულებაში იმყოფებიან — ირაკლი ღარიბაშვილი, გრიგოლ ლილუაშვილი, რომეო მიქაუტაძე, ჯუანშერ ბურჭულაძე და მიხეილ სააკაშვილი.

ცნობისთვის, მურთაზ ზოდელავას, პაატა ბურჭულაძეს და ირაკლი ნადირაძეს 3 მუხლით წაუყენეს ბრალი: სტრატეგიული და განსაკუთრებული მნიშვნელობის ობიექტების ხელში ჩაგდება და ბლოკირების მცდელობის ჩადენილი ჯგუფურად; ჯგუფური ძალადობის ორგანიზება და ხელმძღვანელობა და მოწოდება საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ.

ლაშა ბერიძეს 2 მუხლით: სტრატეგიული და განსაკუთრებული მნიშვნელობის ობიექტების ხელში ჩაგდება და ბლოკირების მცდელობის ჩადენილი ჯგუფურად; ჯგუფური ძალადობის ორგანიზება და ხელმძღვანელობა.

პაატა მანჯგალაძეს ბრალდება ჯგუფური ძალადობის ორგანიზებისთვის წარედგინა.

აღნიშნული დანაშაულები 9 წლამდე პატიმრობას ითვალისწინებს