ოკუპირებულ სოხუმში რუსეთის საელჩომ განაცხადა, რომ რუსული პირადობის მოწმობების გაცემა შეწყდება. ეს განცხადება მას შემდეგ გაკეთდა, რაც აფხაზმა ე.წ დეპუტატმა აკან კვარჩიამ სოციალურ მედიაში ვირუსულად გავრცელებული ბრალდებები გააჟღერა, თითქოს რუსული პირადობის მოწმობები პასპორტის სამსახურებში უკანონოდ ნაწილდებოდა. ამის შესახებ ინფორმაციას OC media ავრცელებს.

რუსეთმა აფხაზეთის მოსახლეობაში თავისი პასპორტები დაარიგა, მაშინ როცა ოკუპირებული აფხაზეთის პასპორტი მხოლოდ გაეროს ხუთი წევრი სახელმწიფოს მიერ არის აღიარებული.

ამ პრაქტიკასთან დაკავშირებით ოკუპირებული აფხაზეთის ე.წ პარლამენტში დახურულ კარს მიღმა შეხვედრა გაიმართა. შეხვედრის შემდეგ ერთ-ერთმა დეპუტატმა, რომელმაც ანონიმურად დარჩენა ითხოვა, ჟურნალისტებს უთხრა:

"არ არსებობს არც ერთი დოკუმენტი, რომელიც რუსული [პირადობის მოწმობების] გაცემას აფხაზეთში ნებას რთავს".

თუმცა OC media-ის ცნობით, ცოტა ხნის შემდეგ პარლამენტის პრესსამსახურმა განაცხადა, რომ ამ საკითხზე გადაწყვეტილება არ მიუღიათ.

ცნობისთვის, პარასკევს ოკუპირებულ აფხაზეთში რუსეთის საელჩომ ოფიციალური განცხადება გაავრცელა, სადაც ნათქვამია, რომ ოკუპირებულ აფხაზეთში რუსული პირადობის მოწმობების გაცემა, რომელიც ფაქტობრივად 2025 წლის აპრილში დაიწყო, მიზნად "აფხაზეთის მოქალაქეებისთვის მომსახურებების მიღების მაქსიმალურ გამარტივებას" ისახავდა.

OC media წერს, რომ აფხაზი დეპუტატების მხრიდან ამ პრაქტიკის უკანონობის კრიტიკისა და რუსეთის მხრიდან აფხაზეთის "სუვერენიტეტისადმი პატივისცემის" დეკლარირების ფონზე, აღნიშნული დოკუმენტების გაცემა შეწყდება. ამის ნაცვლად, რუსული პირადობის მოწმობის ან სხვა ოფიციალური დოკუმენტის მისაღებად მოქალაქეებს რუსეთში გამგზავრება მოუწევთ.