ორი უნივერსიტეტი — თსუ და სტუ აღარ გაერთიანდება, — ამის შესახებ ცოტა ხნის წინ ბრიფინგზე ოცნების პრემიერმა, ირაკლი კობახიძემ განაცხადა. მისი თქმით, "საქართველოს ტექნიკური უნივერსიტეტში მომდევნო აკადემიური წლისთვის აღარ გამოცხადდება მიღება იმ დისციპლინებზე, რომლებიც 1990-იან წლებამდე არ შედიოდა პროგრამაში, შესაბამისად ტექნიკური პროფილის არმქონე სასწავლო პროგრამები ტექნიკურ უნივერსიტეტში დარჩება მილევად რეჟიმში".

"ჩვენ შევთანხმდით, რომ საქართველოს ტექნიკური უნივერსიტეტი აღარ გაერთიანდება თბილისის სახელმწიფო უნივერსიტეტთან. გარდა ამისა, 1 ქალაქი 1 ფაკულტეტი პრინციპის შესაბამისად, საქართველო ტექნიკური უნივერსიტეტი გარდაიქმნება წმინდა ტექნიკურ უნივერსიტეტად. ეს იყო ჩვენი უმაღლესი განათლების კონცეფციის ერთ-ერთი მთავარი მიმართულება. ტექნიკურ უნივერსიტეტში ისწავლება მომავალში მხოლოდ ის დისციპლინები, რომლებიც 1990-იან წლებამდე ტექნიკურ უნივერსიტეტში ისწავლებოდა. საქართველოს ტექნიკური უნივერსიტეტში მომდევნო აკადემიური წლისთვის აღარ გამოცხადდება მიღება იმ დისციპლინებზე, რომლებიც 1990-იან წლებამდე არ შედიოდა პროგრამაში, შესაბამისად ტექნიკური პროფილის არმქონე სასწავლო პროგრამები ტექნიკურ უნივერსიტეტში დარჩება მილევად რეჟიმში. ანუ კიდევ ერთხელ — აღარ ერთიანდება ორი უნივერსიტეტი", — თქვა ირაკლი კობახიძემ ბრიფინგზე.

კობახიძის განცხადებით, ის უნივერსიტეტის შენობები, რომლებსაც "განსამზღვრელი მნიშვნელობა აქვს" ის აკადემიური დატვირთვით ადგილზე დარჩება.

"შენობებს რაც შეეხება, ზოგადი, პრინციპი არის შემდეგი — თუ რომელიმე შენობას აქვს განმსაზღვრელი მნიშვნელობა, შესაბამისი, უნივერსიტეტის იდენტობისთვის ეს შენობა დარჩება ადგილზე შესაბამისი აკადემიური დატვირთვით. მაგალითად, თსუ-ს შემთხვევაში ცალსახად აღვნიშნეთ, რომ, ბუნებრივია, ვერ შევეხებით და არ შევეხებით არავითარ შემთხვევაში I და II კორპუსებს გამომდინარე იქიდან, რომ ეს კორპუსები არის თსუ-ს იდენტობის განუყოფელი ნაწილი. ასევე სამედიცინო უნივერსიტეტსაც არ ვეხებით ყველაფერი რჩება ისე, როგორც იყო. რაც შეეხება ტექნიკურ უნივერსიტეტს ამაზე გვქონდა დღეს საუბარი — გვექნება მსჯელობა და აქაც გადაწყვეტილება მიღებული იქნება კონსულტაციების საფუძველზე," — განაცხადა კობახიძემ.

ჟურნალისტების დასმულ კითხვაზე, თუ რა ბედი ეწევათ სტუ-ს ჰუმანიტარულ მიმართულებით დასაქმებულ ლექტორებს, კობახიძემ განაცხადა, რომ მათზე იზრუნებენ.

"რაც შეეხება, ტექნიკური უნივერსიტეტის ჰუმანიტარული მიმართულების ლექტორებს, კიდევ ერთხელ გავიმეორებ — ჩვენ გვაქვს დეფიციტი, სიჭარბე კი არ გვაქვს, სერიოზული დეფიციტი გვაქვს კადრების თვალსაზრისით საუნივერსიტეტო სისტემაში, შესაბამისად, როგორც კი დადგება ამის დრო და საჭიროება, მაქსიმალურად ვიზრუნებთ კონკრეტულ მასწავლებლებზე, რომლებიც სტუ-ში ჰუმანიტარული ნაწილით დასაქმებულები არიან," — თქვა კობახიძემ.