7 თებერვალს, 11:00 საათზე ექსპოჯორჯიას III პავილიონში პროფესიული დისკუსია გაიმართება.

როგორც ღონისძიების ორგანიზატორები თვლიან, საქართველოში წარდგენილი "კრწანისი-გონიოს" მასშტაბური ურბანული პროექტი, მიუხედავად მისი დეკლარირებული მიზნებისა, შეიცავს კრიტიკულ რისკებს, რომლებიც საზოგადოებრივი განხილვის მიღმა რჩება.

"ჩვენი მიზანია არა ემოციური პროტესტი, არამედ ფაქტებზე დაფუძნებული ანალიზი, პროფესიული მსჯელობა და ერთიანი სამუშაო ჯგუფის შექმნა, რომელიც დაიცავს ქვეყნის სტრატეგიულ ინტერესს", — წერენ დისკუსიის ორგანიზატორები და აცხადებენ, რომ კრწანისი-გონიოს პროექტთან დაკავშირებით გამოწვევები არსებობს.

ესენია:

"გაუმჭვირვალობა: გადაწყვეტილებები ქვეყნის სტრატეგიულ რესურსებზე (მიწა, საგადასახადო რეჟიმი) მიიღება ფართო საზოგადოების ჩართულობის გარეშე.

ეკოლოგიური საფრთხე: პროექტი ეხება საერთაშორისო კონვენციებით დაცულ გონიოს ზურმუხტის ზონას და თბილისის ეკოლოგიური ბალანსისთვის კრიტიკულ კრწანისის ტყეპარკს.

ეკონომიკური რისკი: პროექტის ფინანსური და სამართლებრივი პასუხისმგებლობა გადადის მოქალაქეებზე, მაშინ როცა სარგებელი მცირე ჯგუფებისთვის არის გათვლილი.

ინსტიტუციური კრიზისი: იგნორირებულია პროფესიული წრეების აზრი და არსებობს ინტერესთა კონფლიქტისა და კორუფციის მაღალი ალბათობა.

ჩვენი პოზიციაა: ამ ვითარებაში დუმილი დანაშაულის თანაზიარობაა. ქვეყნის მომავალი არ უნდა წყდებოდეს დახურულ კარს მიღმა!", — წერია ღონისძიების ვებგვერდზე.

7 თებერვალს დაგეგმილი კონფერენციის მომხსენებლები არიან: არქიმანდრიტი დოროთე (ყურაშვილი), რატი ამაღლობელი (პოეტი), ხათუნა გოგალაძე (გარემოს დაცვა), კახა არცივაძე (ბიომრავალფეროვნება), ნიკოლოზ ალავიძე (ეკონომიკა), ჰანს გათბროდი (გამჭვირვალობა), მარინა გულედანი (კაპიტალის ბაზარი), ლევან ნადიბაიძე (ეკონომიკა).

რაც შეეხება კონფერენციის საორგანიზაციო ჯგუფს, მის შემადგენლობაში არიან: ნიკოლოზ ალავიძე (ფინანსისტი), ვახტანგ ბეჟიტაშვილი (საერთაშორისო ეკონომიკური ურთიერთობები), ნინო ზაუტაშვილი (ჟურნალისტი), დათა კიზირია (ანალიტიკოსი), გოგლა ჟვანია (პოლიტიკოსი),
ვიქტორ ყიფიანი (იურისტი), ნიკა შურღაია (მენეჯერი), კახა ჩიქოვანი (თადარიგის ვიცე-პოლკოვნიკი).