ევროკავშირი მრავალი წელია მხარს უჭერს საქართველოში სურსათის უვნებლობის მიმართულებით მიმდინარე რეფორმებს და ეხმარება მოსახლეობას შეიტყოს სურსათის უვნებლობისა და მომხმარებელთა უფლებების შესახებ.

ევროკავშირის დაფინანსებით მიმდინარე ერთ-ერთ პროექტს — სურსათის უვნებლობის, სანიტარიისა და ფიტოსანიტარიის სექტორის მხარდაჭერა (ENPARD IV) ჩეხეთის განვითარების სააგენტო ახორციელებს და ის მიზნად ისახავს, როგორც სურსათის უვნებლობის სექტორის სისტემურ დონეზე განვითარებას, ისე საინფორმაციო კამპანიების განხორციელებას მთელი ქვეყნის მასშტაბით.

ხსენებული კამპანიის ფარგლებში, სურსათის უვნებლობისა და განათლების ექსპერტებმა შექმნეს საგანმანათლებლო რესურსები სურსათის უვნელობის შესახებ, საქართველოს სკოლებში არაფორმალურ საგანმანათლებლო აქტივობებში დასანერგად.

აღნიშნული ინოვაციური რესურსები მოიცავს საგანმანათლებლო მასალებსა და ინტერაქციულ სამაგიდო თამაშებს სკოლის მოსწავლეებისთვის და ხელმისაწვდომია, როგორც სკოლებში, ისე ონლაინ გამოსაყენებლად. ეს მასალები მიზნად ისახავს მასწავლებლებისა და სკოლის მოსწავლეების აღჭურვას პრაქტიკული ცოდნითა და უნარებით სურსათის უვნებლობის, მომხმარებელთა უფლებების და საკვების ჯანსაღად მოხმარების შესახებ.

საგანმანათლებლო რესურსებს შეგიძლიათ გაეცნოთ აქ:

● სურსათის უვნებლობა და ხარისხი - მასწავლებელთა სახელმძღვანელო

● სამაგიდო თამაშები სურსათის უვნებლობაზე

რას მოიცავს მეთოდოლოგია

მასწავლებლებზე მორგებული მეთოდოლოგია მოიცავს მასალებს 7-12 კლასის სკოლის მოსწავლეებისათვის და აერთიანებს ხუთ ძირითად თემას:

• სურსათის უვნებლობა, უსაფრთხოება და ხარისხი
• მსოფლიოს ჯანმრთელობის ორგანიზაციის (WHO) სურსათის უვნებლობის ხუთი ძირითადი პრინციპი
• სურსათის ეტიკეტირება და მომხმარებლისთვის ინფორმაციის მიწოდება
• აკვები დანამატები
• სურსათისმიერი დაავადებები

პროექტის ფარგლებში შექმნილი საგანმანათლებლო მასალები ეფუძნება არაფორმალური განათლების პრინციპებს, რაც გულისხმობს, რომ სასწავლო პროცესი მნიშვნელოვნად სცდება ინფორმაციის მშრალად მიღებას — ინტერაქციული გაკვეთილები უზრუნველყოფს მოსწავლეების აქტიურ ჩართულობას. ეს მიდგომა ორიენტირებულია მოსწავლეებზე და მათი საჭიროებების გათვალისწინებით, აყალიბებს ინკლუზიურ საგანმანათლებლო გარემოს. მნიშვნელოვანია ასევე, რომ თითოეული აქტივობა ადაპტირებულია განსხვავებულ საგანმანათლებო საჭიროებაზე.

მეთოდოლოგიის მთავარი მიზანია მოსწავლეებში ცნობიერების, ღირებულებებისა და პრაქტიკული უნარების განვითარება. პრაქტიკული და გამოცდილებაზე დაფუძნებული სწავლების გზით, სტუდენტებს ეძლევათ საშუალება შეისწავლონ და გამოიყენონ სურსათის უვნებლობლობასთან დაკავშირებული ინფორმაცია ყოველდღიურ ცხოვრებაში. სწავლა წახალისებულია ჯგუფური მუშაობის, შემოქმედებითობისა და თანასწორი მონაწილეობით.

მაგალითად, ერთ-ერთი აქტივობის ფარგლებში მოსწავლეები ქმნიან გამოგონილ საკვებ პროდუქტს — უნდა მოიფიქრონ მისი შეფუთვა, მარკეტინგული სლოგანი და ეტიკეტი — რაშიც იყენებენ სურსათის უვნებლობის შესახებ მიღებულ ცოდნას სახალისო და პრაქტიკული გზით.

სწავლა თამაშ-თამაშით სკოლასა და სახლში

სწავლის პროცესის კიდევ უფრო გასამრავალფეროვნებლად, პროექტის გუნდმა შეიმუშავა სამი ორიგინალური სამაგიდო თამაში, რომელთაგან 60-ზე მეტი კომპლექტი უკვე გადაეცა სკოლებს მთელი ქვეყნის მასშტაბით.

ეს თამაშები არა მხოლოდ გართობას ისახავს მიზნად, არამედ წარმოადგენს ინტერაქციულ და გამოცდილებაზე დაფუძნებულ სასწავლო ინსტრუმენტებს, რომლებიც ხელს უწყობს სურსათის უვნებლობის პრინციპების ეფექტურად ათვისებას. თამაშის გზით მოსწავლეები უკეთ აკავშირებენ მიღებულ თეორიულ ცოდნას პრაქტიკასთან — რაც ხშირად რთულად მისაღწევია ტრადიციული სწავლების გზით.

თამაშები ასევე მშობლებისთვისაც არის გათვალისწინებული და საშუალებას აძლევს ოჯახებს სასწავლო პროცესში სახლის პირობებში ჩაერთონ.

პროექტის მიღწევები და სამომავლო გეგმები

სურსათის უვნებლობის შესახებ საგანმანათლებლო მიმართულებით მუშაობა პროექტის გუნდმა გასულ წელს საგრანტო კონკურსით დაიწყო, რომლის მეშვეობითაც გამარჯვებული რეგიონული საზოგადოებრივი ორგანიზაციები გამოვლინდნენ. ამ ორგანიზაციებმა სკოლის მასწავლებლებთან მჭიდრო თანამშრომლობით განახორციელეს ცნობიერების ამაღლების აქტივობები და მოამზადეს მასწავლებლები არასაფორმალური სასწავლო სესიებისათვის.

ინიციატივის ფარგლებში:

• საქართველოს სხვადასხვა რეგიონში გადამზადდა 100 მასწავლებელი
• 1600-ზე მეტმა მოსწავლემ მიიღო მონაწილეობა ინტერაქციულ სემინარებში
• 200-ზე მეტი მოსწავლე ჩაერთო შემოქმედებით აქტივობებში, მათ შორის კონკურსებსა და ფლეშმობებში.

დღეს შემუშავებული მეთოდოლოგია და თამაშები ხელმისაწვდომია ფართო აუდიტორიისთვის, რაც სკოლებსა და ოჯახებს დამატებით შესაძლებლობას აძლევს, ჩაერთონ სურსათის უვნებლობასთან დაკავშირებულ არაფორმალურ საგანმანათლებლო აქტივობებში.

მდგრადი რესურსი სკოლებისა და საზოგადოებისათვის

ეს ინიციატივა ერთჯერადი კამპანიის ფარგლებს სცდება. იგი ქმნის მდგრად სასწავლო რესურსს, რომელიც მასწავლებლებს საშუალებას აძლევს გამოიყენონ ის, როგორც სასკოლო კლუბების, ასევე კურიკულუმს მიღმა დაგეგმილი სხვადასხვა აქტივობის ფარგლებში. მშობლებს კი ეძლევათ შესაძლებლობა ბავშვებში უვნებელი კვების ჩვევები სახლის პირობებში წაახალისონ.

არ აქვს მნიშვნელობა ხართ სკოლის დირექტორი, მასწავლებელი თუ მშობელი — ეს არის შესაძლებლობა, შეიძინოთ მტკიცებულებებზე დაფუძნებული ცოდნა და უნარები და გამოიყენოთ ისინი საკლასო ოთახსა თუ საოჯახო გარემოში — სახალისო, შემოქმედებითი და ეფექტური გზით.

გაიგეთ მეტი სურსათის უვნებლობის შესახებ მიმდინარე კამპანიის შესახებ.

ევროკავშირის მიერ დაფინანსებული პროექტი „სურსათის უვნებლობის, სანიტარიისა და ფიტოსანიტარიის სექტორის მხარდაჭერა საქართველოში (ENPARD IV)“ თანადაფინანსებულია შვედეთის საელჩოს, ჩეხეთის განვითარების სააგენტოსა (CzDA) და გაეროს სურსათისა და სოფლის მეურნეობის ორგანიზაციის (UN FAO) მიერ. პროექტს ახორციელებენ გაეროს სურსათის და სოფლის მეურნეობის ორგანიზაცია (UN FAO) და ჩეხეთის განვითარების სააგენტო (CzDA).

ეს სტატია შექმნილია ევროკავშირის მხარდაჭერით. მის შინაარსზე სრულად პასუხისმგებელია ჩეხეთის განვითარების სააგენტო და შესაძლოა, არ გამოხატავდეს ევროკავშირის შეხედულებებს.