27 იანვარს, 18:00 საათზე, პენიტენციურ დეპარტამენტთან, ანასტასია ზინოვკინას და ნანა სანდერის სიცოცხლისა და ჯანმრთელობის გადასარჩენად, საპროტესტო აქცია გაიმართება. ამის შესახებ ქალთა მოძრაობის წარმომადგენლებმა, ქალმა პოლიტიკოსებმა და ანასტასია ზინოვკინას და ნანა სანდერის გულშემატკივრებმა დღეს გამართულ ბრიფინგზე განაცხადეს.

ისინი მოითხოვენ, რომ ორივე მათგანს ჩაუტარდეს სრული, დამოუკიდებელი სამედიცინო გამოკვლევები — ყველა აუცილებელი აპარატურული, ლაბორატორიული კვლევითა და სპეციალისტების ჩართულობით.

"დღეს აქ ვართ ქალთა მოძრაობა და ქალი პოლიტიკოსები ანასტასია ზინოვკინას და ნანა სანდერის ადვოკატებთან და გულშემატკივრებთან ერთად, რათა საზოგადოებას გავაგებინოთ, რომ ანასტასია ზინოვკინასა და ნანა სანდერის სიცოცხლე და ჯანმრთელობა რეალურ საფრთხეშია.

სპეციალური პენიტენციური სამსახური თვეებია არ რეაგირებს. არ არსებობს წერილობითი პასუხები. არ ტარდება სრულფასოვანი სამედიცინო გამოკვლევები და ორივე ქალის ჯანმრთელობის მდგომარეობა ყოველდღიურად უარესდება.

ანასტასია ზინოვკინას სჭირდება დაუყოვნებლივი, კომპლექსური სამედიცინო კვლევები (MRI, CT, და ა.შ) ლაბორატორიული ანალიზები და შესაბამისი სპეციალისტები. ეს არის უკვე გადაუდებელი აუცილებლობა.

ნანა სანდერის შემთხვევაში ვხედავთ მკურნალობის შეფერხებას ან უარს, მედიკამენტების დაგვიანებას, მკურნალობის უწყვეტობის დარღვევას.

ამიტომ, 27 იანვარს 18:00 საათზე შევიკრიბებით აქ, სპეციალურ პენიტენციარულ სამსახურთან და მოვითხოვთ:

• ორივე ქალისთვის ჩატარდეს სრული, დამოუკიდებელი სამედიცინო გამოკვლევები — ყველა აუცილებელი აპარატურული, ლაბორატორიული კვლევითა და სპეციალისტების ჩართულობით.

• გამოკვლევები და მკურნალობა განხორციელდეს სამოქალაქო კლინიკაში ან, შესაძლებლობის შემთხვევაში, №18 სამკურნალო პენიტენციურ დაწესებულებაში, საერთაშორისო და ეროვნული სტანდარტების დაცვით.

• ექიმების რეკომენდაციები შესრულდეს სრულად და უწყვეტად — უზრუნველყოფილი იყოს საჭირო მედიკამენტები, მკურნალობის მონიტორინგი და ჯანმრთელობის გაუარესების პრევენცია.

სპეციალურ პენიტენციურ სამსახურს შევახსენებთ, რომ პატიმრობა არ ნიშნავს ადამიანისთვის უფლებების ჩამორთმევას და სახელმწიფოს ვალდებულებაა დაიცვას ყველა პატიმრის ჯანმრთელობის უფლება.

სოლიდარობა თავისუფლების მოპოვებისთვის ბრძოლაში ერთ-ერთი მნიშვნელოვანი მორალური საყრდენია, რომელიც საზოგადოებას აუცილებლად სჭირდება.
დღეს, სოლიდარობა სჭირდებათ ანასტასია ზინოვკინას და ნანა სანდერს.

მათ ორივეს ჯანმრთელობის მძიმე მდგომარეობა აქვთ, სჭირდებათ კვლევები, სამედიცინო დაწესებულებაში შესაბამისი მკურნალობა. ორივე საუბრობს გაუსაძლის ფიზიკურ ტკივილზე და ღირსებასთან შეუსაბამო მოპყრობაზე. ანასტასია გაუმჭვირვალე პროცედურების შემდეგ მკაცრი რეჟიმის დაწესებულებაში გადაიყვანეს.

ქართული პროტესტის შეუდრეკელ და განუყოფელ ნაწილს წარმოადგენენ ქალები.
ჩვენ გვყავს ასზე მეტი პოლიტიკური პატიმარი. გვყავს პოლიტიკური პატიმარი ქალები: მზია ამაღლობელი, ელენე ხოშტარია, თამარ ლორთქიფანიძე, ნანა სანდერი, ანასტასია ზინოვკინა... ტროტუარზე დგომისთვის შესაძლებელია სისხლის სამართლებრივი დევნა დაემუქროს სხვა ქალებსაც.

ადმინისტრაციული პატიმრობით წინასწარი დაკავების იზოლატორებში გამოკეტილი ქალებიც ხშირად ხდებიან ღირსების შემლახავი მოპყრობის მსხვერპლი.

მძიმე იყო ნინო დათაშვილის მდგომარეობა და საზოგადოების ერთიანობამ, სოლიდარობამ მას ჯანმრთელობა შეუნარჩუნა.

ახლა მნიშვნელოვანია, 27 იანვარს, 18:00 საათზე შევიკრიბოთ აქ, პენიტენციურ სამსახურთან კონკრეტული მოთხოვნებით, რომ ჩვენს თანამებრძოლებს — ანასტასიას და ნანას მკურნალობა უზრუნველყოს იმ სამსახურმა, რომელიც პასუხისმგებელი და ვალდებულია შესაბამის სტანდარტებზე.

თავისუფლება პოლიტპატიმრებს", — წერია აქციის ორგანიზატორების მიერ გავრცელებულ განცხადებაში.