UFC-ის საშუალო წონის ჩემპიონმა ხამზატ ჩიმაევმა უარყო გავრცელებული ინფორმაცია იმის შესახებ, რომ გროზნოში ავტოკატასტროფაში მოყვა. მან 18 იანვარს, Instagram-ზე გამოაქვეყნა მისი და ადამ კადიროვის ფოტო, რომელსაც ჩეჩნურად დააწერა:

"სანამ რწმენა გვექნება, ცუდი არაფერი დაგვემართება".

ხამზატ ჩიმაევის "სთორი" ინსტაგრამზე

ხამზატ ჩიმაევის "სთორი" ინსტაგრამზე

ადამ კადიროვი ფოტოზე მონიშნულია, როგორც "კიონახი", რაც ჩეჩნურიდან ითარგმნება, როგორც "ღირსეული კაცი" ან "კეთილშობილი კაცი".

რუსული მედია წერს, რომ მებრძოლი დაუკავშირდა თავის წარმომადგენლებს და დაადასტურა, რომ ის კარგად არის და არაბთა გაერთიანებულ საემიროებში იმყოფება.

ადამ კადიროვთან ერთად ფოტოს გავრცელების შემდეგ, ჩიმაევმა გამოაქვეყნა ვიდეო საკუთარი მანქანიდან, სადაც აცხადებს:

"შეიძლება ზოგიერთებს ეს არ უნდათ, მაგრამ ცოცხალი და ჯანმრთელი ვარ. აი, თქვენ: აბუ-დაბიში მივდივარ, ამინდი შესანიშნავია. ასე რომ, ნუ იჩქარებთ დამარხვას"

შეგახსენებთ, რომ 16 იანვარს "რადიო თავისუფლებაზე" დაყრდნობით OC-Media-მ გაავრცელა ინფორმაცია, რომ ჩეჩნეთის ლიდერის, რამზან კადიროვის, 18 წლის ვაჟი, ადამი, ავტოკატასტროფაში მოყვა და მძიმე მდგომარეობაშია.

ოპოზიციური ტელეგრამ-არხმა NIYSO-მ ასევე გაავრცელა ცნობა იმის შესახებ, რომ არსებობს დაუდასტურებელი ინფორმაცია, რომ ავარიაში მასთან ერთად შესაძლოა ჩეჩენი UFC-ის ჩემპიონი, ხამზატ ჩიმაევიც მოჰყვა. ამას გარდა, NIYSO-მ და სხვა წყაროებმა განაცხადეს, რომ ჩიმაევი შესაძლოა გარდაცვლილიყო.

თუმცა, NIYSO-მ ხაზგასმით აღნიშნა, რომ ჩიმაევის ინციდენტში მონაწილეობის შესახებ ინფორმაცია არ დადასტურებულა და რომ დაშავებულებში შესაძლოა სხვა მაღალი რანგის ჩეჩენი ჩინოვნიკის შვილი იყოს. სხვა წყაროები, მათ შორის სახელმწიფო წყარო, აცხადებენ, რომ ჩიმაევი დუბაიში იმყოფება.

ავარიის შესახებ ინფორმაციის გავრცელებიდან მალევე, სახელმწიფო საინფორმაციო საშუალება Chechnya Today-მ ჩიმაევის გარდაცვალების შესახებ გავრცელებული ჭორები უარყო.

მათ მის გარემოცვასთან დაახლოებულ წყაროზე დაყრდნობით განაცხადეს, რომ ის "დუბაიში იმყოფება. თავს კარგად გრძნობს".

ამ დროისთვის სამართალდამცავი ორგანოების მხრიდან ავარიის ოფიციალური დადასტურება არ არსებობს.

მეტი ხამზატ ჩიმაევის შესახებ: