შპს "სფერო ჰოლდინგის" საქმეზე "სფერო ინვესტის" დირექტორი, გიორგი მურუსიძე იტალიაში დააკავეს. ტვ პირველის ინფორმაციით, მურუსიძის დაკავებას მას შემდეგ მოხდა, რაც მან იტალიაში პოლიტიკური თავშესაფარი მოითხოვა.

"გიორგი მურუსიძეზე გამოცხადებული იყო საერთაშორისო დევნა და მას კიდევ იტალიაში მოუთხოვია პოლიტიკური თავშესაფარი და დაწყებულა ადმინისტრაციული წარმოება პოლიტიკური თავშესაფრის მოთხოვნასთან დაკავშირებით. ეს დოკუმენტაციის მოსაპოვებლად, ალბათ, იქ რაღაც დამატებით დოკუმენტაციას ტოვებ, მისულა საელჩოში. საელჩოში რომ მივიდა, დააკავეს," — განაცხადა ადვოკატმა ნონა ფილაურმა.

2025 წლის 11 ნოემბერს, მოქალაქეების კუთვნილი 12 მილიონი ლარის თაღლითურად მითვისების საქმეზე "სფერო ჰოლდინგის" დამფუძნებელი გივი წულეისკირი დააკავეს, ხოლო "სფერო ინვესტის" დირექტორის, გიორგი მურუსიძის მიმართ სამართლებრივი დევნა დაიწყო და საერთაშორისო ძებნა გამოცხადდა.

აღნიშნულ სისხლის სამართლის საქმეზე ბრალდებულ პირებს, ბრალდება საქართველოს სისხლის სამართლის კოდექსის 180-ე მუხლის მეორე ნაწილის "ა" და მესამე ნაწილის "ა" და "ბ" ქვეპუნქტებით წარედგინათ, რაც სასჯელის სახედ და ზომად 9 წლამდე ვადით თავისუფლების აღკვეთას ითვალისწინებს.

"სფერო ჰოლდინგისა" და "სფერო ინვესტის" მფლობელმა, გივი წულეისკირმა შიმშილობის დაწყება დაანონსა.