ოცნების პარლამენტის თავმჯდომარემ შალვა პაპუაშვილმა აშშ-ს მიერ 66 საერთაშორისო ორგანიზაციის დატოევბაზე კომენტირებისას განაცხადა, რომ "ვენეციის კომისიამ შეიცვალა საკუთარი პროფილი და გადაიქცა ჩვეულებრივ პოლიტიკურ კომენტატორად, რომელიც პოლიტიკური დღის წესრიგიდან გამომდინარე დებს სხვადასხვა მოსაზრებებსა და დასკვნებს".

"66 ორგანიზაცია დატოვა აშშ-მა, როგორც გუშინ განაცხადეს მათ. თავისთავად ეს ადასტურებს კიდევ ერთხელ იმას, რასაც ჩვენ ვსაუბრობთ, რომ მეორე მსოფლიო ომის შემდეგ შექმნილი საერთაშორისო წესრიგი, რომლის ნაწილიც არის სხვადასხვა საერთაშორისო ორგანიზაცია, მასში წევრობა და ამ ორგანიზაციების ფარგლებში საკითხების განხილვა, აღარ არსებობს, მორღვეულია. როდესაც ასეთ ორგანიზაციებში ამერიკა არ არის წევრი და მათ შორის გამოდის ასეთი დასაბუთებით, რომ ეს არის უსარგებლო, ფულის მფლანგველი ორგანიზაციები, თავისთავად აჩვენებს იმას, რომ მათ სერიოზულობას უკვე წყალი აქვს შეყენებული და ადასტურებს კიდევ ერთხელ იმას, რასაც ვამბობდით, რომ საერთაშორისო წესრიგი აღარ არსებობს.

რაც შეეხება ვენეციის კომისიას კონკრეტულად, ჩვენ უკვე რამდენიმე ხანია ვსაუბრობთ იმას, რომ ვენეციის კომისია იქცა ქვეყნების წინააღმდეგ პოლიტიკურ იარაღად , იმისთვის, რომ ქვეყნებს თავს მოახვიონ სხვადასხვა პოლიტიკური დღის წესრიგიდან გამომდინარე სხვადასხვა ინსტრუმენტები თუ ინსტიტუტები. საქართველოსთან დაკავშირებით ეს ძალიან კარგად გამოჩნდა არაერთხელ, როცა ჩვენ ვნახეთ, ნაცვლად სამართლებრივი დასკვნებისა და მოსაზრებებისა, პოლიტიკური დასკვნები და მოსაზრებები, რაც აშკარად იკვეთება ვენეციის კომისიის ანგარიშებში, ამაზე ჩვენ მათ შორის ვენეციის კომისიისთვისაც გვაქვს შეხვედრების დროს ნათქვამი.

ჩვენ ევროსაბჭოს წევრი ვართ, ვენეციის კომისია გახლავთ ერთ-ერთი ინსტიტუტი ევროსაბჭოში და ჩვენთვის როგორც წევრი სახელმწიფოსთვის შემაშფოთებელია, რომ ვენეციის კომისიამ შეიცვალა საკუთარი პროფილი და იმ პროფესიული სამართლებრივი დასკვნების შედგენის ნაცვლად, რაც იყო პატივცემული და მნიშვნელოვანი ყველა ქვეყნისთვის, გადაიქცა ჩვეულებრივ პოლიტიკურ კომენტატორად, რომელიც პოლიტიკური დღის წესრიგიდან გამომდინარე დებს სხვადასხვა მოსაზრებებსა და დასკვნებს. ზუსტად ეს დაადასტურა დღეს აშშ-მა, რომელმაც დატოვა ვენეციის კომისიის წევრობა და დატოვა ამ დასაბუთებით, რომ ეს არის უსარგებლო, ფულის მფლანგველი ორგანიზაცია. ეს, რა თქმა უნდა, აძლიერებს ჩვენს მოსაზრებას, რომ ვენეციის კომისია აცდენილია იმ თავდაპირველ მისიას, რომელიც ჩადებული იყო მასში" — განაცხადა ოცნების პარლამენტის თავმჯდომარემ შალვა პაპუაშვილმა.

ცნობისათვის, იურისტმა გიორგი ბურჯანაძემ 6 იანვარს სოციალურ ქსელში დაწერა, რომ ვენეციის კომისია საქართველოზე ახალ სამართლებრივ დასკვნას მოამზადებს.

მისი განმარტებით, დასკვნა მოქალაქეთა პოლიტიკური გაერთიანების კანონს შეეხება, რომლითაც პარტიების აკრძალვა იგეგმება. ვენეციის კომისიის ვებგვერდზე დასკვნის მომზადების სავარაუდო თარიღად 2026 წლის მარტია მითითებული.

"ვენეციის კომისია საქართველოზე ახალ სამართლებრივ დასკვნას მოამზადებს.

ამჯერად მოქალაქეთა პოლიტიკური გაერთიანების კანონზე, რომლითაც რეჟიმი პარტიების აკრძალვას ისახავს მიზნად.

ეს მოთხოვნა ვენეციის კომისიას ევროსაბჭოს საპარლამენტო ასამბლეის მონიტორინგის კომიტეტმა გადასცა დეკემბრის დასაწყისში და ვენეციის კომისიამ უკვე გამოაქვეყნა ვებგვერდზე.

დასკვნის მომზადების სავარაუდო თარიღად მითითებულია 2026 წლის მარტი", — დაწერა გიორგი ბურჯანაძემ.