ინფრასტრუქტურის მინისტრის ყოფილი მოადგილეს კობა გაბუნიას პატიმრობა ნახევარი მილიონი ლარის ოდენობის გირაოთი შეუცვალეს და სასამართლო დარბაზიდანვე გაათავისუფლეს. გადაწყვეტილება მოსამართლე არსენ კალატოზიშვილმა მიიღო.

30 ოქტომბერს, კობა გაბუნია სახელმწიფო-პოლიტიკური თანამდებობის პირის მხრიდან სამსახურებრივი უფლებამოსილების ბოროტად გამოყენებისთვის ე.წ. საბავშვო ბაღების საქმეზე დააკავეს. ის სსიპ საქართველოს მუნიციპალური განვითარების ფონდის კურატორი გახლდათ.

ფინანსთა სამინისტროს საგამოძიებო სამსახურის ცნობით, მუნიციპალური განვითარების ფონდიდან 30 საბავშვო ბაღის რეაბილიტაციისთვის გამოყოფილი 9 365 801 ლარის თაღლითურად დაუფლებისა და 1 211 000 ლარის უკანონო შემოსავლის ლეგალიზაციის ფაქტზე შპს "ლაგი კაპიტალის" ხელმძღვანელი პირები დააკავეს, მათ შორის — სსიპ საქართველოს მუნიციპალური განვითარების ფონდის ყოფილი აღმასრულებელი დირექტორი დავით ტაბიძე, ფონდის პროგრამის მენეჯერი და ამავე სამსახურის პროექტის მენეჯერი, რომლებმაც სრულად ითანამშრომლეს გამოძიებასთან და მათ აღკვეთის ღონისძიების სახით სასამართლოს მიერ გირაო შეეფარდათ.

გამოძიება საქართველოს სისხლის სამართლის კოდექსის 332-ე მუხლის პირველი და მე-2 ნაწილებით, 180-ე მუხლის მე-2 და მე-3 ნაწილებით, 194-ე მუხლის მე-2 და მე-3 ნაწილებით და 362-ე მუხლის მე-2 ნაწილით მიმდინარეობს, რაც სასჯელის სახით თავისუფლების აღკვეთას 9-დან 12 წლამდე ვადით ითვალისწინებს.